Şrift ölçüsü:
A+
A
A-
Kr
26 Aprel 2016

İlahi! Mövcudatı yaratdıqdan sonra onu öldürməyinin hikməti nədir?

Məxluqatın bədənində pak ruhlar və qaralmış ruhlar vardır
Böyük arif və şair Mövlana Cəlaləddin Rumi “Məsnəvi” (Məsnəviyi-mənəvi adı ilə məşhurdur) əsərində şeir dili ilə insanın yaranışı və ölümünə aid ibrətli bir dastan yazmışdır.
Bir gün həzrət Musa (ə) Allaha belə deyir: - İlahi! Mövcudatı yaratdıqdan sonra onu öldürməyinin hikməti nədir? Nə üçün gözəl məxluqlar yaradırsan, sonra isə onu məhv edirsən?
Allah buyurdu: - Bilirəm ki, bu sualınla bu işdəki hikmət və sirri öyrənmək və onu insanlara çatdırmaq istəyirsən.
Bu işin hikmətini bilmək istəyirsənsə, get torpaqda buğda toxumu ək, onun sünbül gətirməsini gözlə.
Musa (ə) buğdanı əkdi, onun sünbül gətirməsini gözlədi. Elə ki sünbüllər yetişdi, əlinə bir oraq götürərək onu biçdi. Sonra onu xırmana tökərək, buğdasını samanından ayırmağa başladı. Allah tərəfindən nida gəldi- Ey Musa! Sən buğdanı əkdin, onu becərdin. Bəs indi o sünbülləri niyə kəsirsən?
Musa (ə) cavab verdi: - Mənim Pərvərdigarım! Bu sünbüllərdə faydalı və xeyirli buğdalar gizlənib. Buğda dənələrinin samanın arasında qalması düzgün deyil. Sağlam ağıl hökm edir ki, buğdaları samandan ayırım.
Allah buyurdu: - Bu biliyi kimdən öyrəndin ki, buğda xırmanı düzəldəsən?
Musa (ə) dedi- Ey böyük Allah! Sən mənə dərk və ayırd etmək qüvvəsi verdin.
Allah buyurdu: - Bəs necə ola bilər ki, sənin ayırd etmə qüvvən olar, amma Mənim olmaz? Məxluqatın bədənində pak ruhlar və qaralmış ruhlar vardır. Buğdanı samandan ayırmağın lazım olduğu kimi yaxşıları pislərdən də ayırmaq lazımdır. Dünya məxluqlarını ona görə yaradıram ki, Allahın gizli hikmət gövhərləri aşkar olsun.