Нәгл олунмуш һәдисләрин бир гисми, Гуранын үзүндән охунмасынын онун әзбәр охунмасындан даһа фәзиләтли олдуғуна дәлаләт едир. Бу мәзмунда нәгл олунмуш рәвајәтләрдән бириндә дејилир: Исһаг ибни Әммар Имам Садигдин (ә) сорушур. Мән Гураны артыг һифз етмишәм (әзбәрләмишәм), ону әзбәр олараг охусам јахшыдыр, јохса үзүндән? Имам (ә) бујурду:
«Үзүндән оху, бунун савабы даһа чохдур. Вә бил ки, Гуранын јазыларына бахмаг өзү бир ибадәтдир.»Имам Садигдин (ә) нәгл олунмуш башга бир һәдисдә дејилир:
«Гураны үзүндән охујан шәхсләрин ҝөзләри дә Гурандан бәһрәләнәр. Ата-анасынын ҝүнаһлары күфр илә дүнјадан көчсәләр белә, азалар.»Гуранын үзүндән охунмасына мүсәлманларын сөвг етдирилмәсинин бир нечә сәбәб вә сирри вардыр.
1. Гуран нүсхәләри чохалыр вә гәдим нүсхәләрин мәһв олуб арадан ҝетмәсинин гаршысы алыныр. Әҝәр мүсәлманлар Гураны һифз едәрәк бу гајда илә охујарларса, ҝетдикҹә Гуран нүсхәләринә олан еһтијаҹ азалар вә нәтиҹәдә Гуран надир нүсхәләрдән биринә чевриләр.
2. Һәдисләрдә гејд олундуғу кими, Гуранын үзүндән охунмасы инсанын мәнәвијјатына мүсбәт тәсир ҝөстәрир. Ејни заманда Гуран јазыларына бахмагдан ләззәт алыр вә бир чох һалларда ҝөз ағрыларындан аманда галыр.
3. Гураны үзүндән охумаг, охуҹунун Гурана даһа чох диггәт јетирмәсинә сәбәб олур. Белә олдугда, инсан Гуранын ачылмајан сирр вә инҹәликләри барәсиндә даһа чох арашдырмалар апарыр. Белә ки, инсан үрәк ачан мәнзәрәјә диггәтлә бахдыгда руһән архајынлашыр вә өзүндә мәнәви раһатлыг һисс едир.
Гуран ајәләринә нәзәр салараг онун дәрин мәналарыны дәрк етмәјә чалышан охуҹу, ондан вәсфолунмаз ләззәтләр алыр. Нәтиҹәдә гәлби нурланыр вә мәнәви паклыға наил олур.
