Шрифт өлчүсү:
А+
А
А-
16 Август 2015

Бу ҝүн Һәзрәт Мәсумәнин (с.ә) виладәт ҝүнүдүр

Һәзрәт Фатимеји Мәсумәнин (с) һәјатына бир бахыш

О һәзрәтин ады Фатимә, мәшһур ләгәби исә «Мәсумә»-дир. Атасы, шиәләрин једдинҹи имамы Муса ибн Ҹәфәр (имам Казим) әлејһис-салам, анасы исә сәккизинҹи имам һәзрәт Рза (әлејһис-салам)-ын анасы сајылан Нәҹмә Хатун (әләјһа-салам)-дыр.
Беләликлә дә һәзрәт Мәсумә (әләјһа-салам) вә имам Рза (әләјһис-салам) бир ата-анадан дүнјаја ҝәлән баҹы вә гардашдылар.
О һәзрәт һиҹри-гәмәри тарихи илә 173-ҹү ил, Зигәдә ајынын 1-дә мүгәддәс Мәдинә шәһәриндә дүнјаја ҝөз ачмышдыр.
Ушаглыг дөвранында икән Бағдад шәһәриндә Һарунун зинданында һәбс олунмуш атасынын шәһид едилмәси һадисәси илә үзләшмиш вә ондан сонра гардашы һәзрәт имам Рза (әләјһис-салам) ону өз һимајәси алтына алараг сахламышдыр.
Һиҹри-гәмәри тарихи илә 200-ҹү илдә Мәмун Аббасинин тәкид вә һәдә-горхуларындан сонра имам Рза (әлејһис-салам) сүрҝүнә бәнзәјән Мәрв сәфәринә дүзәлмиш вә јанында Әһли-бејтиндән һеч бир кәс олмајан һалда Хорасана ҝетмишдир.
Гардашынын һиҹрәтиндән бир ил кечдикдән сонра, имам Рза (әләјһис-салам)-ы ҝөрмәк шөвгүндә олан һәзрәт Мәсумә (әләјһа салам) бир дәстә гардашы вә гоһуму илә Хорасана тәрәф јола дүшдү.
Кечдикләри бүтүн шәһәр вә мәһәлләләрдә халг онлары тәнтәнә илә гаршылајыр, онлара мәһәббәт вә гонагпәрвәрлик ҝөстәрирди.
Һәзрәт Мәсумә (әләјһа салам) да бөјүк бибиси һәзрәт Зејнәб (әләјһа салам) кими гардашы имам Рза (әлејһис-салам)-ын мәзлумијјәти вә гүрбәтини мөмин вә мүсәлман халглара чатрырыр, һәмчинин онлара өзү вә Әһли-бејтин Бәни-Аббасын һијләҝәр һөкумәтинә гаршы олан мүхалифәтини бәјан едирди.
Карван «Савә» шәһәринә чатдыгда, һөкумәт мәмурларынын һимајә етдији бир дәстә Әһли-бејт мүхалифләри онларын габағыны кәсәрәк онларла вурушмаға башладылар.
Нәтиҹәдә тәхминән карванын бүтүн кишиләри шәһид олуб, бир рәвајәтә әсасән һәзрәт Мәсумә (әләјһа салам) исә зәһәрләнди.
Һәр һалда о һәзрәт ја чохлу гәм-гүссә вә јахуд зәһәр нәтиҹәсиндә хәстәләнди вә Хорасана ҝетмәкдән аҹиз галыб, Гум шәһәринә тәрәф јола дүшдү.
О һәзрәт сорушду: Бу «Савә» шәһәриндән «Гум» шәһәринәдәк нә гәдәр јол вардыр?
Јолун мигдарыны о һәзрәтә дедикдә, бујурду: «Мәни Гум шәһәринә апарын. Чүнки атамдан ешитмишдим ки, (белә) бујурурду: «Гум шәһәри бизим шиәләримимзин мәркәзидир».
Гум шәһәринин ағсаггаллары бу севиндириҹи хәбәри ешитдикдә, о һәзрәти (ә) гаршыламаға ҝетдиләр.
«Әшәри» гәбиләсинин ағсаггалы «Муса ибн Хәзрәҹ» о һәзрәтин дәвәсинин ҹиловуну тутмуш, халгын чоху исә пијада вә миник һалында һәзрәтин әјләшдији кәҹавәни әһатәјә алмышдылар. Һәзрәт Мәсумә (әләјһа салам) һиҹри-гәмәри тарихи илә 201-ҹи илин тәгрибән Рәбиул-әввәл ајынын 23-дә мүгәддәс Гум шәһәринә дахил олду.
Даһа сонра «Мир мејданы» адланан бир јердә (Муса ибн Хәзрәҹин шәхси мәнзили гаршысында) кәҹавәдән ениб, онун гонағы олду.
О һәзрәт он једди ҝүн мүддәтиндә бу шәһәрдә јашамыш вә бу мүддәтдә ибадәтлә мәшғул олмушдур. О һәзрәтин ибадәт етдији јер, бу ҝүнәдәк «Ситтијјә мәдрәсәсиндә» - «Бејтун-нур» ады илә мәшһурдур. О јер зијарәтҝаһ сајылыр.
Беләликлә дә Рәбиус-сани ајынын ону вә башга рәвајәтә әсасән он икиси (201 һ. г.), һәзрәт өз гардашы имам Рза (әлејһис-салам)-ы ҝөрмәдән, гүрбәт јердә бөјүк гәм-гүссә илә дүнјасыны дәјишиб, шиәләри матәмә гәрг етди.
Гум әһалиси о һәзрәтин пак бәдәнини бөјүк тәнтәнә илә бу ҝүнкү һәрәм јериндә олан о заманкы «Бабилан бағына» апардылар.
Гәбр һазыр олдугда, о һәзрәтин кимин әли илә дәфн едилмәсиндә чәтинликлә үзләшдиләр.
Елә бу вахт гиблә тәрәфдән үзләринә нигаб чәкмиш ики атлы сүрәтлә онлара јахынлашды. Намаз гылдыгдан сонра онлардан бири гәбрин ичәрисинә дахил олду, диҝәри исә һәзрәтин пак ҹәсәдини галдырараг она верди.
О ики нәфәр ишләрини гуртардыгдан сонра һеч бир кәслә данышмадан өз атларына миниб орадан узаглашдылар.
О ики нәфәрин Аллаһ-тааланын ики һөҹҹәти сајылан һәзрәт имам Рза (әлејһис-салам) вә имам Ҹавад (әлејһис-салам) олмасы нәзәрә чарпыр. Чүнки шәриәт гајдаларына әсасән ҝүнаһсыз гадын бәдәни ҝүнаһсыз шәхсин әли илә дәфн олунмалыдыр. Белә ки, һәзрәт Фатимә (әләјһа салам)-ы Әмирәлмөминин Әли (әлејһис-салам) вә һәзрәт Мәрјәм (әләјһа салам)-ы Иса (әләјһис-салам) шәхсән дәфн етмишдир.
Һәзрәт Мәсумә (әлејһис-салам)-ын дәфниндән сонра Муса ибн Хәзрәҹ онун мүгәддәс гәбринин үзәриндә гамышдан тохунмуш һәсирдән бир өртүк дүзәлтди.
Һиҹри-гәмәри тарихи илә 256-ҹы илдә исә имам Ҹавад (әлејһис-салам)-ын гызы Зејнәб (ә), о һәзрәтин гәбри үзәриндә илк дәфә олараг ҝүнбәз тикдирди.
Беләликлә дә һәзрәт Мәсумә (әләјһа салам)-ын мүгәддәс гәбри Әһли-бејт (әлејһимус-салам)-ын ардыҹыллары, һәмчинин вилајәт вә имамәт ашигләринин зијарәтҝаһы вә шәфа јеринә чеврилди.


3849 بازدید
در حال ارسال اطلاعات...