22 Октјабр 2013
Гарғыш, нифрин кими тутур?

"Ләнәт" сөзү говмаг, узаглашдырмаг мәнасыны билдирир. Јәни Аллаһ биринә гәзәбләниб ону өзүндән узаглашдырыр. (Гамуси-Гуран). Шүбһәсиз ки, бу хош бир һал дејил. Шәриәтдә инсаны ләнәтләмәк ҹаиз сајылмыр. Јалныз истисна һалларда, истисна шәхсләри ләнәтләмәк иҹазәлидир. Ҹамеус-сәадәт китабында јазылыр ки, кафирләри, фитнәкарлары, залымлары ләнәтләмәк олар. Зүлм вә күфр башчыларыны ләнәтләмәк мүстәһәб сајылыр. Башгаларына ләнәт охумаг һарамдыр. Шүбһәсиз ки, мүсәлман бир инсаны гарғымаг ону ләнәтләмәк кимидир. Јалныз мүсәлманын шәри дөзүлмәз һәддә чатанда вә инсан чыхылмаз вәзијјәтә дүшдүкдә ону ләнәтләјә биләр. Һәдисдә нәгл олунур ки, бәзән мәзлум залыма о гәдәр ләнәт ҝөндәрир ки, онун ҹәзасы бу ләнәтләр олур, һәлә артыг да галыр. Бу һалда залым гијамәт ҝүнү артыг галмыш ләнәтин әвәзини истәјир.
Әли ибн Әбуһәмзә Имам Садигин (ә) белә бујурдуғуну нәгл едир: "Ләнәт ағыздан чыхандан сонра бир мүддәт үнвансыз галыр. Әҝәр ләнәт ҝөндәрилән шәхс ләнәтә лајиг олса она ҝедир, лајиг олмаса ләнәт едәнин өзүнә гајыдыр." Имам Багир (ә) бујурур: "Ләнәт ағыздан чыхандан сонра ләнәтләјәнлә ләнәтләнән адамын арасында галыр. Әҝәр ләнәтләнән шәхс лајиг олмаса өз саһибинә гајыдыр. Мөмини ләнәтләмәкдән горхун, бу ләнәт өзүнүзә гајыдар." (Сәвабул-әмал).
Имам Сәҹҹад (ә) һеч вахт валидејнләринин јанында бир шеј јемәзди. Сәбәби сорушуланда бујурду: "Горхурам ки, онларын ҝөтүрмәк истәдији тикәни габаға дүшүб ҝөтүрәм вә онлардан габаға кечәм."
Имам Һәсән Әсҝәринин (ә) тәфсириндә дејилир ки, ики нәфәр арасында мүбаһисә дүшәндә бир-бирләрини ләнәтләсәләр ләнәт јухары галхар вә лајиг шәхсә чатмаг үчүн Аллаһдан изн истәјәр. Аллаһ мәләкләринә бујурар: "Әҝәр онлардан бири ләнәтә лајиг дејилсә һәр ики ләнәти о биринә ҝөндәрин. Әҝәр һәр икиси ләнәтә лајигсә һәр биринин ләнәтини о биринә чатдырын. Әҝәр һеч бири ләнәтә лајиг олмаса онларын ләнәтләрини Пејғәмбәр вә Әлинин илаһи сифәтләрини инкар едән јәһуди вә мәсиһиләрә үнванлајын." (Биһарул-әнвар).
Дүнјасыны дәјишмиш адамлары ләнәтләмәјә иҹазә верилмир. Һәзрәт Пејғәмбәр (с) бујурур ки, өлүләри ләнәтләмәјин, онлар ҹәзаларына чатыблар. Битки вә һејванлары ләнәтләмәк дә пис сајылыр.
Һәзрәт Пејғәмбәр (с) бујурур: "Атанызын сизи ләнәтләмәсиндән горхун. Белә бир ләнәт булудлары парчалајар вә әршә галхар. Аллаһын гаршысына ҝәләндә Аллаһ бујурар ки, ону јеринә јетирәҹәјәм. Атанызын сизә ләнәтиндән горхун, бу ләнәт гылынҹдан итидир." (Әл-Нәвадир).
Имам Һәсән Әсҝәринин (ә) тәфсириндә гејд олунур ки, ләнәт кимин ағзындан чыхса да лајиг олана чатар. Әнкәбут ајәсинин 8-ҹи ајәсиндә охујуруг: "Биз инсана ата-анасына јахшылыг етмәји (онларла ҝөзәл давранмағы) төвсијә етдик. (Еј инсан!) Әҝәр (валидејнләрин) билмәдијин бир шеји Мәнә шәрик гошмағына ҹәһд ҝөстәрсәләр, онлара итаәт етмә. Һамыныз (гијамәт ҝүнү) Мәним һүзурума гајыдаҹагсыныз. Мән дә (дүнјада) нә етдикләринизи сизә бир-бир хәбәр верәҹәјәм!" Ајәдән ајдын олур ки, валидејнин бујругларындан гачырмаг олмаз. Јалныз ширк вә күфр тәклифләри гаршысында өвлад ата-анаја итаәт етмәмәлидир.
Валидејнлә үнсијјәтдә сәбирли олмаг, ҝүзәштә ҝетмәк тапшырылыр. Онлар сәнин зәһмәтини чох чәкиб. Инди кичик әзијјәтләринә дөзмәк вәзифәндир. Валидејн јашлашдыгҹа онунла меһрибан олмаг, чәтинликләринә дөзмәк лазымдыр. Сәси валидејнин сәсиндән јухарыја галдырмаг олмаз. Валидејнә јахшылыг Аллаһа јахшылыгдыр. Әҝәр валидејнә меһрибан олсан Аллаһ да сәнинлә меһрибан олар. Бу нөгтәләрә риајәт етмәдикдә инсан валидејнин наразылығы илә үзләшир. Наразылығын ләнәтә чеврилмәси тәһлүкәси бөјүкдүр. Әввәлҹә кичик диггәтсизликлә өзүнү ҝөстәрән мүнасибәт сонрадан кобудлуға чеврилир вә инсан валидејнин ләнәтинә дүчар олур. Бундан горхун!
Еј инсан, мәзлумун ләнәтиндән горх! Онун ләнәти ҝеҹәнин гаранлыгларындан ох кими өтүб сәнә санҹылар. Сән јухудасан, зүлм етдијин шәхс ојагдыр. Аллаһ да ојагдыр вә онун ләнәтләрини ешидир. (Дивани-Әмирәлмөминин)
Nur-az.com