25 Јанвар 2015
Инсан һәјатынын мәрһәләләри
Ҝөрәсән инсан һәјаты нечә мәрһәләдән ибарәтдир?Гурани-Кәримин ајәләринә әсасән инсан һәјаты үч мәрһәләдән ибарәтдир: дүнја һәјаты, бәрзәх һәјаты, гијамәт һәјаты. Бир груп алим Гурани-кәримин бәзи ајәләрини әсас ҝөтүрәрәк белә дүшүнүрләр ки, бәрзәх һәјаты дүнја һәјатынын ардынҹа гијамәтәдәк давам едәсидир. Ујғун фикирә дәлил олараг “нечә ил јердә дајандыныз” ајәси ҝөстәрилир. (“Муминун”, 112.) Гијамәт ҝүнү бу суал бирбаш бәрзәхдән гијамәтә адлајанлара үнванланаҹаг. Гурани-Кәримин башга бир ајәсинә әсасән инсан һәјаты үч мәрһәләдән ибарәтдир. Шәриф ајәјә әсасән Аллаһ-Таала инсаны биринҹи дүнја һәјатында өлдүрдү, сонра ону бәрзәх һәјатына апарды вә нәһајәт, гијамәтдә ону һәмнөвләри илә бир јерә топлады. Имам Ризадан (ә) нәгл олунмуш бир рәвајәтдә дејилир ки, бәшәр һәјаты үч мүһүм ҝүнлә мәрһәләләрә ајрылыр: инсанын доғулуб дүнја һәјатына аддым атдығы ҝүн; дүнјадан ҝетдији ҝүн; мәһшәрдә дирилдији ҝүн.
İмам Риза (ә) белә бир бөлҝүнүн дәлили олараг Һәзрәт Јәһја вә Һәзрәт Иса һаггында назил олмуш бир ајәни гејд етмишдир. Аллаһ-тәала бу ајәләрдә Һәзрәт Јәһјаја үч мәрһәләдә салам ҝөндәрир: һаггын саламы олсун она доғулдуғу ҝүндә, вәфат етдији ҝүндә вә әбәди һәјат үчүн дирчәләҹәји ҝүндә. Өз нөвбәсиндә һәзрәт Иса да ујғун үч мәрһәләдә өзүнә салам ҝөндәрмишдир.
