Şrift ölçüsü:

07 Noyabr 2015

Fikrə dalmışam. Düşünürəm bu zülmlər barədə. Nə haqqı demək olur və nə də haqqı deyəni müdafiə etmək.
Bu fikirlər məni uzaqlara, lap uzaqlara aparıb...
Birdən qarşımda 30-35 yaşlarında bir cavan oğlan görürəm. Və soruşuram, sən kimsən?
Dedi: “Məni tanımadın?”
Dedim: “Siz mənə heç də yad deyilsiz, özünüzdən mənə bir nişanə deyin.”
Dedi: “Məgər bu qədər nişanə sənə kifayət etmədi?”
Dedim: “ Hansı nişanə?”
Dedi: “Mən, zindandan zindana həbs olunanam.
Mən, zindandan, zindana məktub yazanam.
Mən, Zindandan Zindana kitab yazanam.
Mən, haqqı dediyimə görə məhkum olunanam.
Mən, haqqın batırılmaq istədikləri səsəm.
Mən, zülmə göz açdırmayanam.
Mən, zülmü elə beşiyində ikən boğmaq istəyənəm.
Mən, zindanları gəzərək ilahi qanunları icra edən kəsəm.
Mən, hicabın məzlumiyyətinə son vermək istəyən kəsəm.
Mən, heç vaxt zülmə baş əyməyənəm.
Mən, ilahi ədalətin ölkəmizdə bərqərar olmasını istəyən şəxsəm.
Mən..
- Niyə susduz? Xahiş edirəm davam edin.

Dedi: “Mən, Mən namaz üstə vurulanam.”
“Mən, qanı axa-axa namaz qılanam.”
“Mən, şəhadətə susayanam.”
“Mən, şəhidlik məktəbini bizə miras qoyanların davamçısıyam.”
“Mən, zindanlarda nahaq yerə məhkum olunanlara hər gün ürəyi sızıldayanam.
“Mən, Hacı Abgülün “qardaşım” deyə xitab etdiyi şəxsəm.”

Mən bu gəncin dediklərində, suda üzə bilməyən və beləliklə dərin sulara qərq olan şəxs kimi, qərq oldum. Amma o davam edirdi və birdən dedi: “Bəs sən? Sən kimsən?
Dedim: “Mən Məzlumam”
“Mən, həqiqəti müdafiə etdiyi üçün “səni də həbs edərik” deyilən kəsəm.”
“Mən, “etdiyin etirazları internetdən yığışdır” deyilən kəsəm.”
“Mən, bağlanmış məscidlərin açılmasını tələb etdiyim üçün, məzəmmət olunan kəsəm.”

- Sən, Nasir Abdullahsan?
- Xeyr.
- Sən, Seyyid Elmansan?
- Xeyr.
- Sən, Elçin Qasımlısan?
- Xeyr.
- Sən Sakit Mirzəsən?
- Xeyr.
- Sən, Sahil Rzalısan?
- Xeyr.
- Sən, Elxan İsgəndərovsan?
- Xeyr.
- Sən, Abbas Hüseynsən?
- Xeyr.
- Sən, Tural Allahverdiyevsən?
- Xeyr.
- Sən, Ağaəli Yəhyayevsən?
- Xeyr.
- Axı sən kimsən?
- Dedim axı, mən Məzlumam...

Yaxşı ey Məzlum! Məni tanıdınmı? Mən kiməm?
- Sən, Hacı Abgülsən?
- Xeyr.
- Sən, Hacı Fəramizsən?
- Xeyr.
- Sən, Nicat Əliyevsən?
- Xeyr.
- Sən Mövsum Səmədovsan?
- Xeyr.
- Sən, Ruhullah Axundzadəsən?
- Xeyr.
- Sən, Araz Quliyevsən?
- Xeyr.
- Sən Hacı Talesən?
- .......................
- Sən Hacı Talesən?
- ... “Mən də “Məzlumam.”
- Bəli. Biz Məzlumuq.