24 Yanvar 2024
ŞAHDIR ƏLİ, HAQQDIR ƏLİ (ə)
Şahi şücaətdir Əli,Rahi hidayətdir Əli,
Kani səxavətdir Əli,
Cahi Cəlalətdir Əli,
Şahdır Əli, Haqqdır Əli,
Nuri qibləgahdır Əli.
Bəzmi əzəl seyyidimiz,
Vəchi gözəl seyyidimiz!
Əsli təməl seyyidimiz,
Muxlis əməl seyyidimiz,
Şahdır Əli, Haqqdır Əli,
Nuri qibləgahdır Əli.
Natiqi Qurandı, bilək!
Sahibi Furqandı bilək!
Dərdlərə dərmandı bilək!
Tanrıdan ehsandı bilək!
Şahdır Əli, Haqqdır Əli,
Nuri qibləgahdır Əli.
Nar ilə nur hakimdir,
Sinayi Tur hakimdir,
Həşr ilə sur hakimdir,
Səbr ilə zur hakimdir!
Şahdır Əli, Haqqdır Əli,
Nuri qibləgahdır Əli.
Sidqu vəfa kanım odur,
Həmişə sultanım odur,
Tək şərəfím, şanım odur,
Sevgili cananım odur,
Şahdır Əli, Haqqdır Əli,
Nuri qibləgahdır Əli.
Yəvmi cəza şafeimiz,
Dafeimiz, rafeimiz,
Neməti həqq, nafeimiz,
Vəsf edilən Fatehimiz!,
Şahdır Əli, Haqqdır Əli,
Nuri qibləgahdır Əli.
Peyğəmbərə səfir ağam,
Möminlərə əmir ağam,
Kəbir ilə kəbir ağam,
Səğir ilə səğir agam,
Şahdır Əli, Haqqdır Əli,
Nuri qibləgahdır Əli.
Şahe mərdan çagırdılar,
Şiri Yəzdan çagırdılar,
Onu sultan çagırdılar,
Piri muğan çagırdılar!
Şahdır Əli, Haqqdır Əli,
Nuri qibləgahdır Əli.
Seyyid öyər mövlasını,
Çəkər zövqü səfasını,
Alar ondan şifasını,
Dərdli tapar dəvasını,
Şahdır Əli, Haqqdır Əli,
Nuri qibləgahdır Əli.
