Аллаһ тәрәфиндән мүәјјәнләшдирилмиш шәкилдә ибадәт дүзҝүндүр.
Шәхси сәлигә вә гејри-дини ҝөстәришләрә әсасланан ибадәт јох, Аллаһ тәрәфиндән мүәјјәнләшдирилмиш шәкилдә ибадәт дүзҝүндүр.
Аллаһын Рәсулу (с) бујурур: “Нијјәтләр, әмәлләр вә сөзләр јалныз ганунлара вә сүннәјә ујғун ҝәлдикдә дәјәрли олур.” (“Гисарул-ҹумәл”, 2-ҹи ҹилд, сәһ.73.)
Демәк, ибадәт формасыны да дин өвлијаларындан өјрәнмәлијик. Һәзрәт Ибраһим (ә) Аллаһдан ибадәтин дүзҝүн үсулуну ҝөстәрмәсини истәјир: “Бизә ибадәтләримизин гајдаларыны ҝөстәр.” (“Бәгәрә” сурәси, ајә 128.)
Намазын бүтөв, јохса јары, аһәстә, јохса уҹа гылынмасында, рәкәтләрин сајы вә бу кими диҝәр мәсәләләрдә дини ҝөстәришләрә тәглид етмәк лазымдыр. Диҝәр һалларда гылынан ибадәтләр дәјәрсиздир.
Мәсәлән, сизә 100 аддым өндә хәзинә ҝизләдилдији дејилир. Сиз 98 вә ја 102 аддымлығы газсаныз, хәзинәни тапмајаҹагсыныз вә әзијјәтиниз сәмәрәсиз олаҹагдыр.
Јахуд кимәсә зәнҝ едәркән бир нөмрә аз вә ја чох јығмагла там башга бир шәхслә тәмасда олаҹагсыныз. Беләликлә, ибадәтләр ҝөстәрилдији кими дәгигликлә јеринә јетирилмәлидир. Неҹә ки, ачарын дишләри азҹа галын, јахуд назик оларса гыфылы ачмаз.
Имам Багир (ә) “Евләрә гапылардан дахил олун” (“Бәгәрә” сурәси, ајә 189.) ајәсини белә тәфсир едир: “Ајәнин мәгсәди будур ки, һәр бир иши өз јолу илә ҝөрүн вә ҝөстәришләрә ујғун әмәл един.” (“Әл-Мизан”, 2-ҹи ҹилд, сәһ.59.)
