Гејб дөврүндә интизарда оланларын әсас еһтијаҹларындан бири мәсум имамын әмәл вә рәфтарларындан нүмунә олараг бәһрәләниб, нәфси тәрбијә етмәкдир. Әмәлдә имамын мәгсәдләринин һәјата кечирилмәси үчүн тәлаш ҝөстәрәнләр өз ишләриндә Имам Һүсејнин (ә) ардыҹылларыны нүмунә сечә биләр. Онлар үчүн Кәрбәла шәһидләриндән үстүн нүмунә ким ола биләр?!
Кәрбәла шәһидләри вә Ашурадан сонракы әсирләр Имам Һүсејнин (ә) мәгсәдләринин һәјата кечирилмәси јолунда оланларыны әсирҝәмәдиләр. Онларын мәгамыны дәрк етмәкдә ағыл аҹиздир. Имам Һүсејн (ә) онларын вәсфиндә бујурур: “Мән өз сәһабәләримдән үстүн вә вәфалы көмәкчи ҝөрмәмишәм.”
Доғрудан да Имам Һүсејнин (ә) јардымчылары бизә елә мејарлар верибләр ки, һәмин мејарлар әсасында өз әмәлләримизи дәјәрләндирә биләрик. Һүсејн (ә) давамчыларынын әмәлләри өзүмүзү дәјәрләндирмәк үчүн бир мәһәк дашыдыр. Биз онлары нүмунә сечәрәк бөјүк зүһур ҝүнүнә һазырлаша биләрик.
Мәһәббәт севәнлә-севилән арасында бир һалдыр. Бу һисс инсан гәлбинин дәринликләриндән ҹошса да өзүнү әмәлләрдә ашкар ҝөстәрир. Јалныз мәрифәт әсасында олан севҝи давамлы вә һәгигидир. Гаршы тәрәфи танымадан севмәк өтәри бир һисс ола биләр. Мәрифәт вә севҝи одур ки, мәһбубу таныјыб севәсән. Имам Меһдијә (әҹ) севҝи јолу ону танымагдан өтүб кечир. Мәсумларын гәбул етдији мәрифәт әксәријјәтин малик олдуғу сәтһи мәрифәт дејил. Мәсумлар јетәрли мәрифәт һаггында билҝи верибләр. Ислам Пејғәмбәриндән (с) сонра үммәтин проблеми бу олду ки, дөврүнүн имамыны лазымынҹа танымады. Куфәлиләр Имам Һүсејни (ә) таныјырдылар. Амма бу танышлыг ад сәвијјәсиндә мәһдудлашмышды, онун архасында бәсирәт јох иди. Куфәлиләр имамәт мәгамыны јетәринҹә танымамышдылар.
Амма имамын карванында оланлар, Ашура әһли ону таныјанлар иди. Онлар бу јолда шәһадәти дүнја һәјатындан үстүн тутдулар. Ашура әһлиндән бири дејир: “Аллаһа һәмд олсун ки, бизә бу шәрафәти нәсиб етди. Бу шәрафәтә чатдыг ки, сизин кәнарынызда шәһадәтә чатаг. Әҝәр дүнја әбәди олса вә биз онда әбәди галсаг, сизинлә бирликдә гијама галхмаг белә бир дүнјадан үстүндүр.”
Ашура әһли имамын вүҹудуну бөјүк илаһи немәт сајырды. Бу Пејғәмбәрин (с) төвсијәси иди. Тарихдә јер алыб ки, мәһәррәм ајынын 2-ҹи ҝүнү имам өз ардыҹыллары илә Кәрбәлаја дахил оландан сонра бир хүтбә охуду. О заман Бурәјр јериндән галхыб деди: “Еј Аллаһ Рәсулунун (с) оғлу! Аллаһ сәнин вүҹудуну бизә немәт гәрар вериб ки, сәнин кәнарында дөјүшәк, сизин јолунузда бәдәнимиз тикә-тикә доғрансын, гијамәт ҝүнү ҹәддиниз шәфаәтчимиз олсун.”
Имамын ардыҹылларынын дөјүш заманы охудуғу шеирләр онларын дәрин мәрифәтиндән данышыр. Онлардан бири дөјүш мејданына чыхаркән белә дејир: “Һүсејин (ә) мәним әмиримдир, неҹә ҝөзәл әмирдир, о гәлбмизин шадланмасы сәбәбидир...” Һәҹҹаҹ ибн Мәсруб Ҹөфи имамын Кәрбәладакы ардыҹылларындандыр. Имам һаггында дејир: “Еј Һүсејн! Еј доғру јолу тапмыш вә доғру јола апаран имам! Бу ҝүн ҹәддин Пејғәмбәрлә (с) ҝөрүшәҹәксән. Сонра атан Әлини (ә) ҝөрәҹәксән. Биз ону Аллаһын вәсиси, һәгиги ҹанишини сајырыг.”
İмам Меһдинин (әҹ) көмәкчиләринин дә дәрин мәрифәти вар. Имам Сәҹҹад (ә) бујурур: “Бу дәрин мәрифәт имама мәһәббәтин гајнағыдыр.” Имам Садиг (ә) бујурур ки, Меһдинин (әҹ) көмәкчиләри дөјүш мејданында синәләрини ирәли вериб Гаими (әҹ) горујарлар.
Мәсум имамларын ардыҹылларынын әсас хүсусијјәтләриндән бири онларын зөһд вә тәгвасыдыр. Мәрифәт инсаны о заман имамын архасынҹа апарыр ки, онда дүнја севҝиси олмасын. Һәгиги интизар әһли мәрифәт сајәсиндә нәфсини дүнја мәһәббәтиндән тәмизләјәнләрдир.
İмам Һүсејнин (ә) көмәкчиләри дүнјаја, аилә-өвлада, вар-дөвләтә севҝини кәнара гојуб ҹанларыны имама тәгдим етмишләр. Имам Һүсејн (ә) Куфәдә шәһадәтә чатмыш Мүслим ибн Әгилин оғлуна бујурур ки, Мүслимин шәһадәти сизин аиләниз үчүн бәс едәр. Имам онлара иҹазә верир ки, евә гајытсынлар. Әгилин өвладлары ҹаваб верди: “Халга дејәк ки, имамызы, рәһбәримизи дүшмәнлә мејданда тәк гојуб ҝәлмишик?! Анд олсун Аллаһа ки, белә олмајаҹаг. Биз ҹанымызы вә малымызы сәнә фәда едәҹәјик!”
Амма гаршы тәрәфдә дүнјаја әсир олмуш, имамы таныдығы һалда ону тәнһа гојанларла растлашырыг. Бунлардан бири Үбејдуллаһ ибн Һүрр Ҹөфидир. О, Имам Һүсејнин (ә) карваны илә растлашанлардандыр. Имам ону карвана гошулмаға чағыранда Үбејдуллаһ дејир: “Анд олсун Аллаһа, сизә гошуланларын әбәди ахирәт сәадәтинә чатаҹағыны билирәм. Амма бу иши мәнә мәҹбур гәбул етдирмә. Чүнки өлүмә һазырлығым јохдур.”
Куфә әһли имама бејәт етмишди. Она һәмкарлыг вәд етмишдиләр. Амма дүнјаја бағлы олдугларындан хәјанәт етдиләр. Куфә әһлиндән кичик бир групу имама садиг галды. Имам онлардан Куфә әһли һаггында сорушанда дедиләр: “Бөјүкләр арасында рүшвәт јајылыб, Куфә әһлинин гәлби сизинлә олса да, гылынҹлары сизә гаршыдыр.”
Имам Һүсејн (ә) бујурур ки, инсанлар дүнјанын гулудур, дин онларын дилиндә долашан гуру сөздүр.”
İмам Меһдинин (әҹ) зүһуру заманы бир өмүр онун интизарыны чәкдијини дејәнләр ондан ајрылар. Имам Садиг (ә) бујурур: “Гаим гијам едәндә заһирдә она көмәкчи кими ҝөрүнәнләр онун әмриндән чыхар.” Нәгл олунур ки, Ашура ҝүнү ҝүнорта вахты савашын гызғын чағында Әбу Сәмамә Саиби Имам Һүсејнин (ә) јанына ҝәлиб деди: “Мән сон намазымы сизинлә гыландан сонра Аллаһын ҝөрүшүнә ҝетмәк истәјирәм.” Һәзрәт бујурду: “Намазы јада салдын, Аллаһ сәни намазы јада саланлардан гәрар версин.” Имам Һүсејн (ә) көмәкчиләринин бир гисми илә намаза дајанды. Сәид ибн Абдуллаһ Һәнәфи намаз гыланларын гаршысында синәсини сипәр едиб онлара атылан охун гаршысыны алырды. Елә белә вәзијјәтдә дә шәһадәтә чатды.
Ашура ҝеҹәси сәһабәләр ибадәтә, Аллаһла раз-нијаза мәшғул идиләр. Рави дејир ки, Һүсејн (ә) вә көмәкчиләри Аллаһла зүмзүмә һалында рүку вә сәҹдәдә сүбһү ачдылар. Хејмәләрдә санки бал арылары зүмзүмә едирди.
Һәзрәт Пејғәмбәр (с) Имам Меһдинин (әҹ) көмәкчиләри һаггында бујурур: “Онлар Аллаһа итаәт јолундадырлар, тәлаш әһлидирләр.” Һәзрәт Әли (ә) бујурур: “Онлар ҝеҹәни ојаг галан инсанлардыр, намазларынын зүмзүмәси бал арыларынын зүмзүмәси кими гулаглара чатар. Ҝеҹәни раз-нијазла сүбһә чыхарлар. Ат үстүндә Аллаһа тәсбиһ дејәрләр.”
Имам Һүсејн (ә) Ашура ҝеҹәси Һәзрәт Зејнәбин (ә) хејмәсинә ҝәлди. Араларында сөбһәт олду. Һәзрәт Зејнәб (ә) имама әрз етди ки, сиз көмәкчиләринизин нијјәтини сынамысынызмы? Һәзрәт Зејнәб (ә) еһтијат едирди ки, дөјүш ҝедишиндә кимсә имамы дүшмәнин әлинә верәр. Имам Һүсејн (ә) бујурду: “Анд олсун Аллаһа, онлары сынамышам, синәләрини сипәр едән инсанлардырлар. Өлүмә ҝөзалты бахарлар, өлүмә иштијаглары көрпәнин ана сүдүнә иштијагындан аз дејил.”
Ашура ҝеҹәси Ислам тарихинин ән ҝөзәл, јадда галан ҝеҹәсидир. Имам һәмин ҝеҹә бүтүн көмәкчиләри үзәриндән бејәти ҝөтүрдү, онлары азад бурахды. Тәклиф етди ки, ҝеҹәнин гаранлығындан истифадә едиб Кәрбәланы тәрк етсинләр. Амма бүтүн көмәкчиләр бундан үзүлдү, имамла бирликдә галды. Мүслүм ибн Әвсәҹә дејир: Еј Пејғәмбәр (с) өвлады, әҝәр сәни бурада гојуб ҝетсәк дүнјада биздән алчағы олмасын! Аллаһа пәнаһ апарырам сәндән узаг дүшмәкдән. О ҝүнү ҝөрмәјим ки, белә бир аддым атым. Әлимдә силаһ олмаса да дашла вурушаҹағам. Һеч вахт сәндән ајрылмајаҹағам, сәнин кәнарында шәһадәтә чатаҹағам.” Сәид ибн Абдуллаһ Һәнәфи дејир: “Анд олсун Аллаһа, һеч вахт сәни тәнһа гојмарам. Аллаһ ҝөрәҹәк ки, Пејғәмбәрин (с) сәнинлә бағлы төвсијәсинә әмәл етдим. Әҝәр сәнин јолунда өлүб јенидән дирилсәм 70 дәфә јенидән бу иши ҝөрәрәм, сәндән ајрылмарам.”
Һазырда биз имамын гејб дөврүндә јашајырыг. Доғруданмы биз онун интизарыны чәкирик? Имам Һүсејн (ә) көмәкчиләри кими ҹанымыздан вә малымыздан кечмәјә һазырыгмы? Һәгиги интизар әһли әмәл мејданында аддым атыр. Һәр сүбһ имамла бејәти тәзәләјир, Аллаһ гаршысында өһдәчилик ҝөтүрүр ки, әһдини позмасын. Сөз верир ки, мөвласынын мүдафиәсиндә дураҹаг, бу јолда һамыны өтүб кечәҹәк. Бу әһди өлүм дә поза билмәз...
Vilayet.nur-az.com
