Ики тарихи мәсәлә шәһадәт верир ки, Имам Әлинин (ә) о ҝеҹәдәки ишини фәдакарлыгдан башга бир шеј адландырмаг олмаз вә о һәзрәт һәгигәтән Аллаһ јолунда өлдүрүлүб шәһид олмаға там мәнада һазыр иди. О тарихи сәнәдләр ашағыдакылардыр:
İмам Әлинин (ә) бу тарихи һадисә илә әлагәдар олараг дедији вә Сүјутинин дә өз тәфсириндә нәгл етдији шерләр о һәзрәтин Пејғәмбәрин јолунда ҹандан кечмәсинә вә фәдакарлығына даир ашкар бир шаһиддир:
"Мән өз ҹанымы јер үзүнүн ән јахшы бир шәхс–Аллаһ евини вә Һиҹри-Ысмајылы тәваф едән ән јахшы бир шәхс үчүн сипәр етдим,
О мөһтәрәм шәхс Мәһәммәд иди. Кафирләр ону гәтлә јетирмәк үчүн тәдбир төкдүкләри вахт мән бу иши ҝөрдүм.
Амма мәним Аллаһым ону дүшмәнләрин һијләсиндән хилас етди.
Мән онун јериндә ҝеҹәләдим вә дүшмәнләрин һүҹумуну ҝөзләјирдим, өзүмү өлүмә вә әсир олмаға һазырламышдым."Сүннү вә шиә алимләри нәгл етмишләр ки, о ҝеҹә Аллаһ Өзүнүн ики бөјүк вә мүгәррәб мәләјинә–Ҹәбраил вә Микаилә хитаб едәрәк бујурду: "Әҝәр мән сизин биринизә һәјат, диҝәринизә өлүм һөкмү версәм, һансыныз өлүмү гәбул едиб һәјаты о биринизә верәрсиниз?" Бу заман онлардан һеч бири өлүмү гәбул едәрәк, диҝәринин јолунда ҹанындан кечмәјә разы олмады. Сонра Аллаһ-Таала онлара белә бујурду: "Јерә енин вә Әлинин өлүмү неҹә гәбул едиб өзүнү Пејғәмбәрә фәда етдијини ҝөрүн, сонра ону дүшмәнләринин шәрриндән сахлајын."
Заманын кечмәси илә бәзиләринин бу бөјүк фәзиләтин үстүнә пәрдә чәкмәсинә бахмајараг, исламын әввәлләриндә Әлинин (ә) бу әмәли дост-дүшмәнин нәзәриндә ән бөјүк бир фәдакарлыг сајылырды. Өмәрин фәрманы илә (хәлифә тәјин етмәк үчүн) тәшкил олунан алты нәфәрлик шурада Әли (ә) бу бөјүк фәзиләти хатырлајараг шура үзвләринә дәлил ҝәтирди вә деди: "Сиз шура үзвләрини Аллаһа анд верирәм, дејин ҝөрүм Пејғәмбәр Һәра мағарасында оланда мәндән башга ким она јемәк апарды?! Мәндән башга ким онун јериндә јатыб өзүнү она ҝәлән бәлалара сипәр етди?!"
Бир ағыздан дедиләр: "Аллаһа анд олсун, сәндән башгасы олмајыбдыр!"
Мәрһум Сејјид ибни Тавусун һәзрәт Әлинин (ә) фәдакарлығы барәдә ҝөзәл бир тәһлили вар ки, ону Ысмаилин фәдакарлығына вә һәмчинин, онун атасынын әмринә сөзсүз тәслим олмасына охшадараг Имам Әлинин (ә) фәдакарлығынын ән јүксәк бир фәдакарлыг олдуғуну исбат етмишдир.
