Шрифт өлчүсү:

28 Март 2014

Һәзрәт Әли (ә) вә һәзрәт Зәһра (с) издиваҹ етдикдән сонра, һәзрәт Пејғәмбәрин (с) мәшвәрәт вә нәзәри илә өз араларында ев ишләрини бөлмәк үчүн о һәзрәтә (с) мүраҹиәт едирләр: Ја Рәсуләллаһ! Биз чох истәјирик ки, ев ишләринин тәгсими сизин нәзәринизлә олсун.
Һәзрәт Пејғәмбәр (с) чөл ишләрини һәзрәт Әлијнин (ә), ев ишләрини исә һәзрәт Зәһранын өһдәсиндә гојур. Әли вә Зәһра шәхси һәјатларында һәзрәт Пејғәмбәрин (с) нәзәринә јер вердикләри үчүн о һәзрәт (с) дә мәһәббәт вә меһрибанлыгла онларын истәјини гәбул етди вә өз нәзәрини верди. Мәхсусән дә һәзрәт Зәһра (с) һәзрәт Пејғәмәбрин (с) ону чөл ишләриндән азад етдији үчүн өз разылығыны билдириб дејир: Бир дүнја хошһал олдум ки, һәзрәт Пејғәмбәр (с) мәни намәһрәм кишиләрлә үзбәүз олмагдан азад етди.
О ҝүндән сонра су ҝәтирмәк, әрзаг, јанаҹаг вә алыш-вериши һәзрәт Әли (ә) јеринә јетирирди. Еләҹәдә ев ишләрини, мәсәлән буғданы, апараны ун едиб хәмир етмәк, чөрәк биширмәк, либас јумаг вә с. ишләри исә һәзрәт Зәһра (с) јеринә јетирирди.
Бунунла јанашы, һәзрәт Әли (ә) вахты оланда ев ишләриндә һәзрәт Зәһраја (с) көмәк едирди. Бир ҝүн һәзрәт Пејғәмбәр (с) онларын евинә ҝәлир вә онлары бирликдә ев ишләриндә чалышдыгларыны ҝөрүр. Сорушур: “Сизләрдән һансы бириниз чох јорулуб, мән онун әвәзиндә ишләјим?” Имам Әли (ә) әрз едир: “Еј Аллаһын Рәсулу! Зәһра јорулуб.”
Беләликлә һәзрәт Пејғәмбәр (с) Зәһраја истираһәт вериб, өзү онун әвәзиндә ишләмәјә башлајыр. Еләҹә дә, әҝәр һәзрәт Әли (ә) бир проблемлә үзләшсәјди, ја сәфәрә ҝетсәјди вә јахуд да ҹиһад олсајды һәзрәт Зәһра өзү чөл ишләрини јеринә јетирәрди. Беләликлә онлар өһдәләринә дүшән вәзифәләрини өзләри јеринә јетирәрди вә хидмәтчијә еһтијаҹ ҝөрмүрдүләр. Бу минвалла өвлад саһиби олурлар вә ев ишләри бир аз да чохалыр.
Бир ҝүн һәзрәт Әли (ә) һәзрәт Зәһранын һәддән артыг чох ишләдијини ҝөрүб, нараһат олур вә һәзрәт Зәһраны атасынын һүзуруна ҝедиб бир хидмәтчи истәмәсини тәклиф едир. Һәзрәт Зәһра бу тәклифи гәбул едиб, атасынын евинә јола дүшүр. Һәмин вахт һәзрәт Пејғәмбәрин (с) евиндә гонаг олдуғундан истәјини атасына демәјә хәҹаләт чәкир. Нәһајәт евә гајыдыр. Аллаһын Рәсулу баша дүшүр ки, Зәһранын нәсә бир истәји варды, амма дејә билмәди.
Сәһәри ҝүн сүбһ тездән гызынын евинә ҝедир. Һәмин вахт Әли илә Зәһра отагда отурмушдулар. Һәзрәт Пејғәмбәр (с) уҹа сәслә Саламун әлејкум дејир.
Əли вә Зәһра хәҹаләтдән ҹаваб вермирләр. О һәзрәт икинҹи дәфә дә Саламун әлејкум дејир. Јенә дә сүкут едирләр.
Үчүнҹү дәфә дә Саламун әлејкум дејир.
Аллаһын Рәсулунун (ә) адәти иди ки, бир кәсин евинә ҝедиб евин вә ја отағын чөлүндән уҹа сәслә үч дәфә салам верәрди. Әҝәр ҹаваб версәјдиләр евә ҝирмәк үчүн иҹазә аларды. Јох, әҝәр ҹаваб вермәсәјдиләр, саламыны үч дәфә тәкрарлајандан сонра ҝери гајыдарды.
Һәзрәт Әли (ә) баша дүшүр ки, Пејғәмбәр (с) үчүнҹү саламдан сонра ҹаваб вермәзләрсә ҝери гајыдаҹаг вә о һәзрәтин зијарәтиндән мәһрум олаҹаглар. Уҹа сәслә дејир: Алејкум Салам, еј Аллаһын Рәсулу, бујурун.
Һәзрәт Пејғәмбәр (с) евә дахил олуб онларын башынын үстә дајаныб Зәһраја дејир: “Дүнән бизә ҝәлдин вә ҝетдин, јәгин ки, бир ишин варды. Де ҝөрүм нә ишин варды?”
Һәзрәт Әли (ә) әрз едир: Ја Рәсуләллаһ! Иҹазә верин мән Зәһранын сизә нијә ҝәлдијини дејим. Зәһраны мән сизин һүзурунуза ҝөндәрмишдим. Ҝөрдүм ки, ев ишләри һәддән артыг чох олуб вә әзијјәт чәкир. Истәдик ки, ев ишләриндә Зәһра үчүн бир хидмәтчи олсун.
Һәзрәт Пејғәмбәр (с) истәмирди ки, өзүнүн вә ја јахынларынын јашајышы үммәти арасында олан фәгирләрдән үстүн олсун. Һәмин вахт Мәдинәдә еһтијаҹлылар һәддән артыг чох иди. Мәхсусән дә һиҹрәт етмишләр арасында фәгир даһа чох иди. Ејни һалда гызынын руһијјәсинә дә јахшы бәләд иди вә билирди ки, Зәһра нә гәдәр ибадәт вә мәнәвијјат ашигидир вә еләҹә дә Аллаһы зикр етмәк она нә гәдәр ҝүҹ вә тәравәт вердијини дә јахшы билирди. Буна ҝөрә дә бујурур: “Истәјирсиниз сизә бир шеј өјрәдим, бүтүн бунлардан јахшы олсун?”
Бујурун, ја Рәсуләллаһ!
Һәр заман јатмаг истәјәндә 33 дәфә Субһанәллаһ, 33 дәфә Әлһәмдулиллаһ вә 34 дәфә Аллаһу Әкбәр зикрини јаддан чыхармајын. Бу әмәлин руһунуза бәхш етдији әсәр хидмәтчинин сизин јашајышыныза бәхш едәҹәји әсәрдән чох-чох үстүндүр.
Һәзрәт Зәһра (с) хошһал вә руһијјә илә үч дәфә дејир: “О әмәлә ки, Аллаһ, Пејғәмбәр разы ола, мән дә разыјам.” (Биһарул-әнвар, 24, 25/10).