Еј Әли! Мән Аллаһдан сәнинлә бағлы беш имтијаз истәдим вә Аллаһ онларын бешини дә мәнә верди.
Мүвәффәг Харәзми Һәнәфи нәгл едир. О, әһли-сүннә мүәллифләриндәндир вә фәзиләт мөвзусунда китаб јазмышдыр. Бу һәдисләр о Һәзрәти (ә) севәнләрин көнлүнү ајдынладыр. Өзүмүзү һазырламалыјыг ки, - тәк адда јох - әмәлдә дә о шәхсијјәтин ардыҹылы олаг. Мүвәффәг Пејғәмбәрин (с) Әмирәлмөмининә (ә) белә бујурдуғуну нәгл едир: "Еј Әли! Мән Аллаһдан сәнинлә бағлы беш имтијаз истәдим вә Аллаһ онларын бешини дә мәнә верди. Биринҹиси будур ки, гијамәтдә торпагдан галхаҹағым заман сән јанымда оласан. Аллаһ буну гәбул етди вә мәнә верди. Аллаһдан истәдим ки, мәхлугатын әмәлләрини илаһи мизанда өлчдүкдә, - бу мизан ифадәси Гуранда ҝәлмишдир - мән орада дајандыгда, сән дә јанымда дајанасан. Аллаһ бу истәјими дә гәбул етди вә мәнә верди. Аллаһдан истәдим ки, гијамәтдә ән бөјүк илаһи бајрағы - гијамәт ҝүнү бүтүн илаһи бајраглардан јүксәк олан вә үзәринә "ниҹат тапанлар ҹәннәтә наил оланлардыр" јазылан бајрағы - сәнә тапшырсын. Аллаһ буну да гәбул етди.
Пејғәмбәрин (с) кәламынын бу һиссәсиндән бәлли олур ки, гијамәтдә бајраглар олаҹаг. Мәхлугатын һәр бир групу бу бајраглардан биринин алтына топланаҹаглар. "Аллаһдан истәдим ки, Көвсәр булағынын сагиси оласан вә Аллаһ буну гәбул етди. Аллаһдан истәдим ки, үммәтимин беһиштә илк ҝирәни сән оласан (јәни сән өндә оласан, үммәтим дә сәнин ардынҹа беһиштә јоллансын) Аллан буну да гәбул етди".
Рәвајәтә ҝөрә сонда Пејғәмбәр (с) бу мәнәви мәгамлары Әли ибн Әбу Талибә (ә) вердијинә ҝөрә шүкүр едир. ("Мәнагиб", Харәзми, сәһ. 293, һәдис: 280; "Үјун әхбар әр-Рза (ә)", ҹ. 1, сәһ. 278 вә ҹ. 2, сәһ. 30; "Сәһифә әр-Рза", сәһ. 48; "Хисал", Шејх Сәдуг, ҹ. 1, сәһ. 314; "Биһар әл-әнвар", ҹ. 40, сәһ. 70.) Һәгигәтән, бу мәгама чатаҹаг һеч бир мәгам ола билмәз.
