Шрифт өлчүсү:
А+
А
А-
09 Декабр 2017

ШЕЈТАН ПЕЈҒӘМБӘРЛӘРӘ ГАЛИБ ҜӘЛӘ БИЛӘРМИ?

Шејтан пејғәмбәрләрин руһуна нүфуз етмәк имканындан мәһрумдур
Суал: Гурани-кәримдә ачыг шәкилдә бәјан олунур ки, Шејтан һәгиги Аллаһ бәндәләринә јахынлаша билмәз. Бәс неҹә олуб ки, шејтан һәзрәт Адәмә јол тапа билиб? Һансы ки, һәзрәт Адәм һәгиги бәндә олмагла јанашы һәм дә Аллаһын Пејғәмбәри иди. “Сәфијјуллаһ” (“Аллаһын сечилмиши”) ләгәбини газанмыш бир шәхс ади бәндәләр кими ола биләрми?!

Ҹаваб:
Аллаһ-тәала шејтанын нәзәринә чатдырды ки, о һәгиги бәндәләри алдада билмәјәҹәк, чиркин ишләри онларын нәзәриндә ҝөзәлләшдирмәјә ҝүҹү чатмајаҹаг вә нәтиҹәдә, онлары ҝүнаһ јола чәкмәјә мүвәффәг олмајаҹаг. Беһиштдә Адәмин башына ҝәлмиш әһвалат исә шејтан әмәли дејилди. Адәмин башына ҝәлән һадисә “тәрке-овла” адланыр. Бу о демәкдир ки, Адәм ҝүнаһа јол вермәмиш, садәҹә, јахшы бир иши тәрк етмишдир. Әслиндә һәр бир шәхс өз ирадәси илә гәлб јолуну шејтанын үзүнә ачыр. Инсанын иҹазәси олмадан шејтан онун гәлбинә дахил ола билмир. Шүбһәсиз ки, Пејғәмбәрләр шејтана белә бир иҹазә вермәмишләр.
Бир гәдәр дә ајдынлашдырсаг, шејтанын јол тапмасы о демәкдир ки, инсанын иманынын зәифлији вә сәһләнкарлығы онун гәлбини шејтана тәслим едир. Бу јолла ҝүнаһ инсанын ҝөзүндә адиләшир. Амма шејтан пејғәмбәрләрин руһуна нүфуз етмәк имканындан мәһрумдур. Әҝәр шејтанын тәһрики илә Адәм гадаған олмуш мејвәдән једисә, бу ҝүнаһ јох, “тәрке-овладыр”. Мејвә јемәк һарам иш сајылмамалыдыр.
Бөјүк шиә алимләри Пејғәмбәрләрин паклығыны әгли дәлилләрлә ајдынлашдырмышлар. Адәмин әһвалаты вә Пејғәмбәрләрин паклығы һаггында даһа мүфәссәл мәлумат әлдә етмәк үчүн “Бөјүк рәһбәрләр” китабына мүраҹиәт един.


3077 بازدید
در حال ارسال اطلاعات...