Һәр бир инсан даһа јухары мәртәбәјә галхмаг үчүн сәј ҝөстәрмәлидир.
ШӘҺИД МҮТӘҺҺӘРИДӘН БИР ХАТИРӘ
Бу әһвалаты о бөјүк алим вә даһи шәхсијјәтин јахын адамлары данышырлар. Дејирләр, бир ҝүн мәрһум Мүтәһһәри өвлијалардан биринин мәһзәриндә оларкән мәрифәти артырмаг јолларындан сөз дүшүр. Өвлија Мүтәһһәридән сорушур: «Намаз заманы гәлбини кәнар фикирләрдән неҹә горујурсан?» Мәрһум Мүтәһһәри ҹаваб верир: «Намазын әввәлиндән ахырынадәк дедијим сөзләрин мәнасына диггәт едирәм. Өвлија бујурур: “Бәс Аллаһа нә вахт диггәт едирсән?”
Олдугҹа уҹа мәтләбдир! Елә бу сөһбәтдән ајдын олур ки, ади инсанларла өвлијалар арасында нә гәдәр фәрг вар. Һәр һалда чалышмалыјыг ки, өз зәиф зикримизә илаһи рәнҝ верәк вә Аллаһдан истәјәк ки, өвлијалара нәсиб етдији ләззәтдән бизә дә даддырсын.
Бәзи инсанлар намазда о гәдәр диггәтсиз олурлар ки, намаз гылдыгларыны јалныз намазы битирдикдән сонра хатырлајырлар. Бир мәртәбә үстүн оланлар намазын сөзләринә диггәт едир. Нөвбәти мәрһәләдә инсан дедији сөзләрин мәна дәринлијинә варыр. Даһа сонракы мәрһәләдә әввәлҹә гәлб, сонра исә дил данышыр. Һәр бир инсан даһа јухары мәртәбәјә галхмаг үчүн сәј ҝөстәрмәлидир. Инсан өзүнү елә тәрбијә едә биләр ки, тәкҹә намазын сөзләринә јох, һәтта әтрафдакы бүтүн шејләрә диггәт вердикдә Аллаһы хатырлајар. Мәсәлән, үзүнә тохунан күләји һисс едән инсан ани олараг Аллаһын гүдрәтини јада салыб, дујдуғу сәринлијә ҝөрә Бөјүк Јарадана шүкр едә биләр. Беләҹә, инсан Аллаһын зикрини артырмаг вә дедији һәр бир сөзүн мәнасыны дәриндән дүшүнмәклә тәһлүкәли гәфләтдән хилас ола биләр.
