Әҝәр Пејғәмбәр (с) һөкумәти давам етсәјди вә бәшәријјәтин тарихи дәјишсәјди, бәшәрин агибәти узун мүддәт ирәлијә дүшәрди

Исламын васитәси илә идеал бир һөкумәт јаранды. Әҝәр Имам Һүсејнин (ә) һадисәсини бир нечә сәтирдә хүласә етмәк истәсәк, белә олур: Бәшәријјәт зүлмә, ҹәһаләтә вә ајрысечкилијә мәруз галмышды. Дүнјанын озаманкы Иран вә Рома империјаларында мөвҹуд олан Гејсәр вә Кәсра һөкумәтләриндән ибарәт олан бөјүк һөкумәтләри аристократија, гејри-халг һөкумәти, мәнтигсиз хәнҹәр, ҹәһаләт вә фәсад һөкумәти иди. Әрәбистан јарымадасы кими кичик һөкумәтләр исә онлардан да пис вәзијјәтдә иди. Ҹаһилијјәт бүтүн дүнјаны бүрүмүшдү. Бу арада Аллаһ Пејғәмбәринин (ә) васитәси илә, Аллаһын јардымы, халгын әзәмәтли вә јорулмаз мүбаризәси илә Ислам нуру әввәлҹә Әрәбистан јарымадасыны ишыгландыра билди, сонра да тәдриҹән ҝенишләнди, шүасы һәр јери бүрүдү. Пејғәмбәр (с) дүнјадан көчдүкдә бу һөкумәт тарих боју бүтүн бәшәријјәтә нүмунә ола биләҹәк шәкилдә ҝүҹлү бир һөкумәт иди. Әҝәр о һөкумәт һәмин истигамәтдә һәрәкәтини давам етдирсәјди, шүбһәсиз, тарих дәјишәрди, ондан әсрләр сонра, инди вә Имам Меһдинин (ә) зүһуру дөврүндә јаранмасы ҝөзләнилән вәзијјәт һәмин дөврдә јаранарды. Әдаләт, паклыг, доғрулуг вә мәһәббәт долу дүнја Имам Меһди (ә) дөврүнүн дүнјасыдыр. Аллаһ билир ки, бәшәр орада һансы әзәмәтләрә наил олаҹаг. Буна әсасән, әҝәр Пејғәмбәр (с) һөкумәти давам етсәјди вә бәшәријјәтин тарихи дәјишсәјди, бәшәрин агибәти узун мүддәт ирәлијә дүшәрди. Лакин бәзи сәбәбләр үзүндән бу баш вермәди.
Пејғәмбәр (с) һөкумәтинин хүсусијјәти белә иди: зүлмә әсасланмаг јеринә әдаләтә әсасланырды, ширкин вә инсанын фикир тәфригәсинин јеринә төвһидә вә Пәрвәрдиҝарын мүгәддәс затынын бәндәлијинә сөјкәнирди, ҹәһаләт әвәзинә елм вә билҝијә архаланырды, инсанларын бир-биринә әдавәти јеринә мәһәббәт, мүнасибәт, достлуг вә сәмимијјәтә сөјкәнирди; јәни заһирдән вә батиндән бәзәнмиш бир һөкумәт иди. Белә бир һөкумәтдә јетишән инсан тәгвалы, иффәтли, алим, аҝаһ, фәал, һәвәскар, актив вә камала доғру ирәлиләјән инсан олур. Әлли ил өтмәклә мәсәләләр дәјишди. Адда Ислам ады галды, лакин батини даһа Ислам батини дејилди. Әдаләтин һакимијјәтинин јеринә јенә зүлмүн һакимијјәти ҝәлди, бәрабәрлијин вә гардашлығын јеринә ајрысечкилик, икитирәлик вә тәбәгәләр арасында бөјүк фәрг вүҹуда ҝәлди, елмин јеринә ҹәһаләт һаким олду. Бу әллииллик дөврдә нә гәдәр јахына ҝәлириксә, бу тәнәззүлә даир јүзләрлә факт вә нүмунә ҝөрүрүк. Тәдгигатла мәшғул оланлар бунлары ҝәнҹ вә арашдырыҹы бејинләр үчүн ајдынлашдырсынлар.
Ајәтуллаһ Сејид Әли Хаменеи