Имам Әли (ә) бујурмушдур:
“Дост ҝејимдәки јамаг кимидир. Бунлары бир-биринә ујғун сечмәк лазымдыр”.“Гүрәр әл-һикәм” ҹ. 1, сәһ. 379.
Белә бир мисал вар: Мин достун олса да аз, бир дүшмән исә чохдур. Вә јахуд дост сечмәк һүнәрдир, ону горујуб сахламаг исә даһа бөјүк һүнәр тәләб едир. Бунлар доғрудур.
Лакин ән өнәмлиси дост сечиминдә мүәјјән “мејарын” олмасыдыр. Јолдашын инсан рәфтар вә дүшүнҹәләриндә нә дәрәҹәдә тәсирли олдуғунун изаһына лүзум јохдур. Бәзән ән әмәлисалеһ инсанлар белә тәсадүфи, јанлыш сечилмиш достларын гурбанына чеврилирләр. Бәзән дә јанлыш јолда олан ҝүнаһкар инсанлар пак, нәфсини ҹиловламыш инсанларла достлуг нәтиҹәсиндә, онларын паклыг, сәдагәт, диндарлыг әтрини дујур вә јени јолун сечимини гаршыларына мәгсәд гојурлар.
Имам Әлинин (ә) тәбири илә десәк, дост сечмәк ҹырыг либаса јамаг вурмаға бәнзәјир. Сечилмиш јамағын рәнҝи, нөвү либаса ујғун олмалыдыр. Неҹә дејәрләр, “су ахар чухуруну тапар”. Инанҹлы мүсәлмана лајиг дост әхлаглы, пак вә иффәтли олмалыдыр. Өз фикир, мәдәнијјәт, дини инанҹларыныз вә милли менталитинизә ујғун достлар сечин. Әкс тәгдирдә јашам тәрзиниз вә иҹтимаи әхлагыныз бир-биринә ујмајаҹаг. Сизин иман, әхлаг вә инанҹларыныза зәрбә вуран дост әјниниздәки “ејбәҹәр јамаг”лы ҝејими хатырладыр.
Ән јахшыларын сечими
Имам Әли (ә) бујурмушдур:
“Өнәмсиз ишә вахт ајыран мүһүм ишләри әлдән вермишдир”.
“Гүрәр әл-һикәм”. ҹ. 2, сәһ. 330.
“Уғурлу һәјат” үчүн ән зәрури мәсәләләрдән бири дә ишләрини планлы шәкилдә јүрүтмәк вә онлардан ән өнәмлисини өн плана салмагдыр.
Һәр шејә онун әһәмијјәт вә зәрурилији гәдәринҹә гијмәт верилмәли, вахт ајрылмалыдыр.
Бүтүн ишләр ејни әһәмијјәтә малик дејил.
İшләрин лазымлысы вә даһа лазымлысы, фајдалысы вә даһа фајдалысы вар. Биринҹи мәрһәләдә бунларын ән өнәмлиси ајырд олунмалы, буна әсасән дә икинҹи мәрһәләдә план ҹызылмалы вә һәјата кечирилмәлидир .
Бу, “идарәчилик” үсүлларындан биридир ки, инсана һәдәфә чатмасына вә фүрсәти максимум дәјәрләндирмәсинә көмәк едир.
Доғрусу, нәјлә мәшғулуг?
Ҝөрәсән, јердә галан даһа өнәмли мәсәләләрмиз вармы? Әҝәр вахтымызы азәһәмијјәтли, гејри-зәрури, фајдасыз ишләрә сәрф етсәк, ҝәләҹәкдә бу лагејдлијимизә ҝөрә тәәссүф едәҹәк, анҹаг уғрадығымыз зәрәрин јерини долдурма имканыны тапа билмәјәҹәјик.
“Өнәмли” вә “ән өнәмли” арасында дүзҝүн сечим хошбәхтлијин зәрури шәртидир. Әкс һалда ҝерчәкләшдирилмәси өнәмли оланлар ҝеридә галаҹаг, азәһәмијјәтлиләр вахтымызы, өмрүмүзү тәләф едәҹәк.
Nur-az.com
