Ермәнистан 44 ҝүнлүк мүһарибәдән сонра баш назир Пашинјаны әвәзләмәјә адам ахтарырды. Азәрбајҹанда олан проблем онларда да бу әрәфәләр мөвҹуд иди: мүхалифәт лидери гытлығы. Бәли, Ермәнистан дүшмән дөвләт олса да биздән олдугҹа демократик бир дөвләтдир. Президентләр вахты битдикдә јерләрини тәрк едиб ҝедирләр. Нијә? Чүнки онларда мүхалифәт дә мүхалифәтдир, халгын да кәсәри вар.
Мәсәлән, һеч бир ај кечмәјиб ки, гондарма һөкүмәтләрини итирдикләри үчүн бир вахт һај-һајла баш назир постуна ҝәтирдикләри Пашинјаны инди кәнара атырлар. (Пашинјан билмәли иди ки, “һајла ҝәлән вајла ҝедәр” зәрби-мәсәләни јадиҝар гојан аталарын балалары илә зарафат етмәк олмаз!)
Пашинјан һөкүмәт башына ҝәләндә дә елә јазырдылар ки, Ермәнистанда даһа чох демократија вар, нәинки биздә. Чүнки Азәрбајҹанда һәлә индијәдәк бир журналистин башына бејзболка гојуб “вајенни мајка” ҝејиниб дөвләтин әввәл президент, сонра баш назир олмуш шәхсини костјум-галстукла отелдә ҝөрүшмәјә мәҹбур едә билмәјиб. О заманлар да ермәниләр мејданлара төкүлүб ҝүнләрлә мејданларда галдылар вә истәдикләринә чатдылар. Бәли, онларын намизәдини Гәрб дәстәкләјирди, елә бизим дә мүхалифәти Гәрб дәстәкләјир, онлар да гәрбпәрәстдир, мүхалифәтимизин лидери дә вар. Амма, биздә бизим мүхалифәт демәк олар ки, һеч бир ишә јарамыр.
Инди дә Пашинјаны баш едән ҹамаат нәһајәт мүхалиф лидери сечә билди. 17 мүхалиф партија бирләшиб бир гоҹа кишини, Ермәнистанын илк баш назири Вазҝени мүхалифәыт лидери сечиб ки, баш назир олуб өлкәни мөвҹуд вәзијјәтдән чыхартсын. Өзү дә бу адам Ермәнистанын илк баш назири олмагдан әлавә һәм дә биринҹи Гарабағ мүһарибәси вахты Мүдафиә назири олуб, Ермәнистанын низами ордусу да мәһз онун баш назир олдуғу вахтда јарадылыб. (Бунун өзү санки мүһарибә анонсу верир)
Демәли, Ермәнистанда тәкҹә ики дәфә президент сечилдикдән сонра вахты битәндә ҝедән игтидар дејил, һәмчинин, игтидарлары бәзән вахтындан тез ҝетмәјә вадар едән мүхалифәт дә биздәкиндән даһа демократдыр. Әслиндә, бүтүн мәсәлә даһа чох халга гајыдыр. Мүхалифәт дә, мүхалифәт лидери дә халг олмаса бош шејдир. Ермәнистанда мәһз халг бир јерә јығылыб јени баш назир сечмәк истәјир.
Биздә исә нәинки мүхалифәт лидери, мүхалифәтин өзү бир ишә јараја билмир. Һәм өз араларында дидишиб-боғушмалары, һәм игтидар тәрәфиндән дармадағын едилмәләри, һәм дә халгын ҝөзүгорхаглығы, мүхалифәтә инанмамалары өлкәмизи пис вәзијјәтә салыб.
Бәјәнмәдијимиз ермәни халгына бахын ки, бир ај дејил ки, ишғал етдикләри торпаглары итирибләр, артыг баш назири бир кәнара атыр, бирлик нүмајиш етдириб јени мүхалифәт лидери сечибләр ки, баш назир олуб өлкәни дүшдүјү дурумдан хилас етсин. Биз исә 30 илә јахындыр ки, өз торпагларымызы ермәниләрә пешкеш едәнләри елә тәгрибән 30 илдир һакимијјәтдә сахлајан милләтик. Елә дүшүнмәјин ки, кимсә дуруб өзүндән Америка иҹад едиб ермәниләри тәрифләјир, ермәниләрин бу ҹүр олмасыны 2 әср әввәл Мирзә Ҹәлил ағзы сулана-сулана гејд едирди.
