
Хәбәрдә дејилир ки, өлкәнин бир груп медиа рәһбәри вә блоҝҝерләр ишғалдан азад олунмуш Ағдам рајонуна сәфәр едибләр. Онлар Ағдамын Ҹүмә мәсҹидиндә олублар. Гејд едәк ки, журналистләрлә бирҝә Президентин көмәкчиси Һикмәт Һаҹыјев дә Ағдамда олуб.
Чох гәрибәдир, ҝөрәсән Һикмәт Һаҹыјев Азәрбајҹанда корона бәһанәсијлә һәлә дә бағлы галан мәсҹидләрә нә вахт ҝедәҹәк?
Билмирәм, мүсәлман олмағымыздандыр, јохса нәдир? “Гујруғумуз” балаҹа гапы арасында галан кими, башга сөзлә десәк бир балаҹа ишимиз Аллаһа дүшән кими башлајырыг “мөмин” олмаға. Дүздүр, бу, инсанда фитридир. Амма, биз һеч фитрәт мәсәләсини дә дүзҝүн анлаја билмирик. Чүнки сәнә јахшылыг едән шәхсә тәшәккүр етмәк дә фитридир, амма инсанларын бөјүк әксәријјәтиндә бу јохдур.
Һикмәт Һаҹыјев кими нә гәдәр инсанымыз Аллаһ билир индијәдәк умурдулар ки, Гарабағ вә әтраф рајонлар ишғалдан азад олунсун ҝедәк мәсҹидләрә. Она ҝөрә јох ки, ҝедиб намаз гылаҹаглар, она ҝөрә ки, ҝедиб Ағдамдакы, Шушадакы мәсҹидләри чәкиб ҝөстәрсинләр ки, ермәниләр дини толерантлығын “атасыны ағладырлар”, мүсәлман ибадәт оҹагларыны тәһгир едирләр. Амма, бәдбәхтләр анламырлар ки, бүтүн бунлары дејәндә онлара дүнја ҝүлүб дејәҹәк ки, сән ҝүја Аллаһ евинә, онун диндар бәндәсинә, руһанисинә һөрмәт едирсән ки? Өлкәниздәки мәһбусларын ләгәбләринә бахын; Һиҹаб мәһбусу, намаз мәһбусу, виҹдан мәһбусу. Намаз гыланы, һиҹабы мүдафиә едәни, виҹдан саһибини гандаллајырсыз, мәсҹиди гыфыллајырсыз, сонра Ағдама ҝедиб өзүнүзү ҝөстәрирсиниз.
Азәрбајҹанда артыг мәсҹидләр ачылмалыдыр. Һүгугшүнаслар дејир ки, мәсҹидләрин ачылмасы һеч бир гануна зидд дејил, диҝәр мүсәлман өлкәләриндә дә мәсҹидләр өз әввәлки фәалијјәтини бәрпа едиб.
Бир Аллаһ билир ки, әҝәр, Азәрбајҹанда диндарлар күтләви шәкилдә мәсҹидләрин ачылмасыны тәләб етсәјди һакимијјәт чохдан онларын гәтијјәтиндән горхуб мәсҹидләри ачаҹагды. Адыны да белә гојаҹагды ки, бәли, Аллаһ евләринин гапысы ачылмалыдыр, артыг диҝәр мүсәлман өлкәләриндә дә мәсҹидләр ачылыб вә с.