Франса ингилабынын әсас шүары азадлыг, Болшевик ингилабынын әсас шүары исә бәрабәрлик иди. Бу азадлыг Гәрбдә тамамилә јанлыш бир мәнаја чеврилди. Инсанларын һәјат јолу сечмәкдә азад олдугларыны ифадә едән бу дәјәр, фәрди вә ҹинси азадлыглара, фәсад азадлығына чеврилди. Халг демократија ады алтында вә мүхтәлиф тәблиғат васитәләрилә, ҝөзәҝөрүнмәз торла мүәјјән режимләрин башчыларынын истәдији бүтүн сәмтләрә чәкилдиләр. Ујғун вәзијјәт ҝүнүмүзәдәк давам етмәкдәдир.
Сијаси азадлығын Гәрбдә һијлә вә ријакарлыг олмасы бу ҝүн тәкҹә бизим сөзүмүз дејил; бу, Гәрбин өзүндә чохсајлы мүтәфәккирләрин, виҹданлы алимләрин сөзүдүр. Заһирдә ҝөрүнән демократијадыр, әслиндә исә һәмин ҝөзәҝөрүнмәз тәблиғат торудур (сечкиләрдә халгын јалныз 30-35 фаизиндән 60 фаизә гәдәри иштирак едир; АБШ-да сәсвермә һүгугу оланларын јалныз 35-40 фаизи сәс верир). Бүтүн тәблиғат машынлары да ҝүҹлүләрин, ширкәт саһибләринин вә мултимилјончуларын ихтијарындадыр; јәни һәр бир авторитар режимдә сөзү кечәнләрин! Бу ҝөзәҝөрүнмәз тор халгы истәдији тәрәфә чәкир, халглара зорла гәбул етдирилән мәгсәд вә усулларын дәјишдирилмәсинә имкан вермир. Бунлар фәсад азадлығыны, сексуал азадлығы, түфејлилик вә әхлагдан гуртулуш азадлығыны јајырлар; чүнки бунлар јенә бу бөјүк ҝүҹләрин хејринәдир.
Гәрбин демократик гурулушу вә тәблиғатын ролу
Бәзи гурулушлар һијлә вә тәблиғатла идарә олунур; мәсәлән, Гәрбин заһири демократик гурулушлары кими. Бәли, бу мәканда тәзјиг, гамчы, бизләмә вә дағлама тоталитар гурулушлардакы кими дејил. Халгын заһирән дә олса, азадлығы вар; амма һијлә илә идарә олунурлар. Бу гурулушларын ихтијарында нәһәнҝ тәблиғат машынлары вар вә халгын бүтүн һәјатыны инһисара алмышлар.
Сиз бахын, бу илләр боју кимсә, нә вахтса, һарадаса дүшмәнләрдән, империалистләрин планларындан, Америка, Исраил вә азадлығын диҝәр әлејһдарларынын дүшмәнчилијиндән данышмышса, бејнәлхалг тәблиғатчылар тәрәфиндән ҝүнаһландырылмышдыр.
Гәрбдә азадлыг вар, амма зүлмлә, позғунлугла бирҝә олан азадлыг. Гәрбдә гәзетләр азаддыр вә һәр шејдән јазырлар. Амма онлар кимләриндир? Мәҝәр халгындыр? Бу ајдын мәсәләдир, ҝедиб бахсынлар. Сиз Авропа вә Америкада капиталистләрә мәхсус олмајан бир санбаллы гәзет ҝөстәрин. Орада мәтбуат азадлығы дедикдә өз сөзүнү данышан, истәдијини ҝөздән салан, истәдијини бөјүдән, иҹтимаи рәји истәдији тәрәфә јөнәлдән капиталистин азадлығы нәзәрдә тутулур. Бу даһа азадлыг олмады ки!
Əҝәр бир шәхс ири капитал саһибләринә вә онларын гүввә мәркәзләринә бағлы олмаса, нә сөзү ешидилир, нә сәси кимсәнин гулағына чатыр, бир сөзлә сөз азадлығындан бәһрәләнмир. Бәли, ири капитал саһибләри өзләринин гәзет, радио вә телевизијалары васитәсилә үрәкләри истәдијини демәкдә азаддырлар. Амма бу азадлыг дәјәр дејил, дәјәрин зиддинәдир. Бу азадлыг халгы позғунлуға вә имансызлыға сүрүкләмәк, истәдикләри јердә мүһарибә јаратмаг, истәдикләри јердә сүлһә мәҹбур етмәк вә истәдикләри јердә силаһ сатмагдыр.
Дејирләр Америка вә Инҝилтәрә гәзетләри азаддыр. Мән сорушурам, һансы гәзет халгын орта вә ашағы тәбәгәләринә мәхсусдур ки, адам гәзетин азадлығындан о тәбәгәнин азадлығыны анласын? Гәзетләр киминдир? Бөјүк картел вә трестләрин, милјончуларын. Бәли, гәзетләр азаддырлар, јәни истәдикләрини јазмагда азаддырлар. Онлар өз мәнафеләринә зидд оланы демирләр. Бу онлара аиддир, демократијанын тәрәннүмү, анасы вә бешији оланлара, онунла фәхр едәнләрә.
Ајәтуллаһ Сејид Әли Хаменеи
