Суријада террорчу лидерләрин мәһв едилмәси әмринин архасында јатан амилләр; Пентагон Суријада террорчу овуна башлајыр
Президент Барак Обама Пентагона "Фәтһ әш-Шам" террор тәшкилатынын (көһнә адла "ән-Нусра") лидерләрини өлдүрмәк барәдә әмр вериб. Бу барәдә “Вашингтон Пост” гәзети АБШ һөкумәтиндәки мәнбәләрә истинадән хәбәр јајыб.
Хәбәрдә гејд олунур ки, Обаманын әмринә әсасән Пентагона мәхсус пилотсуз апаратлар Сурија әразисиндәки террор тәшкилаты лидерләрини изләјиб мәһв едәҹәк. Гәзетә мәлумат верән мәнбә бу әмрин сәбәбинин "әл-Гаидә"нин Авропанын ҹәнубунда террор актлары планлашдырмасы һагда мәлуматлар олдуғуну дејиб. Анҹаг бунун инди, АБШ-да президент сечкисиндән бир ҝүн сонра верилмәси суаллар доғуруб.
Гејд едәк ки, АБШ һөкумәти “ән-Нусра”ны террор тәшкилаты кими таныса да, бир сыра Јахын Шәрг өлкәләри, о ҹүмләдән Түркијә Суријада Бәшәр Әсәдә гаршы вурушан әсас силаһлы гүввә олдуғу үчүн “ән-Нусра” илә әмәкдашлыг едир. Һәтта заман-заман бир сыра әрәб өлкәләринин “ән-Нусра”ја силаһ вә мадди јардым етмәси барәдә хәбәрләр јајылыб. Факт одур ки, бу груплашма ИШИД-дән сонра Суријада ән ҝүҹлү вә бөјүк силаһлы тәшкилатдыр.
Ејни заманда Русија бу груплашманы бирмәналы олараг террор тәшкилаты һесаб едир вә Американы Һәләбдәки бу груплашмаја гаршы кампанијаны дәстәкләмәјә чағырыб. Мәһз бу мүбаһисәләр нәтиҹәсиндә бу илин јајында "ән-Нусра" адыны дәјишәрәк Шамын Фәтһ Ордусу едиб вә "әл-Гаидә" илә бағларыны гопардығыны бәјан едиб. Анҹаг буна бахмајараг, груплашма һәр һансы фәалијјәт вә ја стратеҝијасыны дәјишмәјиб. Бу сәбәбдән дә тәшкилата мүнасибәт дәјишмәјиб, јәни террорчу һесаб едәнләр әввәлки фикриндә галыр. Инди исә АБШ ордусу артыг бу тәшкилаты һәдәфә алыр. Бу о демәкдир ки, Әфганыстан, Ираг, Пакистан вә Јәмәндән сонра Суријада “Предатор” пилотсуз апаратлары фасиләсиз учушлар һәјата кечирәрәк “ән-Нусра” лидерини ахтараҹаг. Бу апаратлар Аризона штатында јерләшән базалардан (әсасән Аризона штатында Һолломан һәрби һава базасы - К.Р.) идарә олунур. Давамлы учушлар һәјата кечирән бу апаратлар изләмә вә лазым ҝәдикдә һәдәфи мәһв етмәк үчүн ракетләрлә тәҹһиз олунуб. Бу исә о демәкдир ки, јахын ајларда Суријада террор тәшкилатлары үчүн чәтин дөнәмләр башлајаҹаг.
О ки галды бу гәрары инди вермәсинә, һәләлик президент Обаманын мәһз сечкиләрдән сонра бу ҹүр сәрт гәрар вермәсинин әсл сәбәбләри дәгиг мәлум дејил. Мүмкүндүр ки, Обама посту тәһвил верәнә гәдәр террора гаршы мүбаризәдә ҹидди ирәлиләјишләр етмәк вә Трампа бөјүк террор проблемләри гојуб ҝетмәк истәмир.
Чүнки индики вәзијјәтдә һакимијјәт өтүрүлмәси һәм Обаманын тәнгидләринә сәбәб ола биләр, һәм дә һәр заман гүрурландығы мүсбәт фәалијјәтләринә көлҝә салаҹаг. Барак Обама буна гәдәр бин Ладенин мәһв едилмәси әмәлијјаты илә гүрурланараг дүнјада терроризмә гаршы ҹидди уғур газандығыны бәјан едирди. Анҹаг инди Сурија вә Ирагда террор ҝениш вүсәт алыб. Вә бу вәзијјәтин јаранмасында иттиһам олунан тәрәфләрдән бири дә Обама администрасијасыдыр.
Бу бахымдан, Јахын Шәргдә һәлл олунмамыш террор проблемини хәләфинә өтүрмәси президент кими Обаманын активинә мәнфи јазылаҹаг. Бу сәбәбдән дә Обама Суријада террора зәрбә вурмаг, Вашингтонун террора дәстәк вермәси илә бағлы иттиһамлары сусдурмаг истәјир.
