Милли Мәҹлиси гәнаәт едәк
Ҝәлән ил Милли Мәҹлис вә онун апаратынын сахланылмасына 23 089 714 манат хәрҹләнәҹәк.2017-ҹи илдә Милли Мәҹлисин сахланылмасы дөвләт бүдҹәсинә бу иллә мүгајисәдә 1,74% вә јахуд 394 780 манат баһа баша ҝәләҹәк.
2017-ҹи илдә бөһранын Еверест зирвәси бојда олаҹағыны нәзәрә алсаг, 23089714 манатын әһәмијјәтли мәбләғ олдуғуну дејә биләрик. Бу гәдәр мәбләғин һансыса мәҹлисә хәрҹләнмәси абсурд ҝөрүнүр. Мәсәлән, бу гәдәр вәсаит хејир-шәр мәҹлисләринин пулсуз гурулмсына сәрф олунсајды, икиәлли разы олардым. Һеч олмаса биләрдик ки, касыб ҹамаат мәҹлисләрини дөвләтин гајғысы һесабына јола верәҹәк. Индики һалда исә 23 милјон манат 125 нәфәрин бөјүк залда клавиатурајла ојнамасына, “һә-јох” демәсинә сәрф олунаҹаг.
Онсуз да узун илләрди Милли Мәҹлисин сахланмасына күлли мигдарда вәсаит хәрҹләниб вә бу хәрҹләрин нәтиҹәсиндә вәтәндаш һеч нә тапмајыб. Нә үрәк гыздыраҹағымыз вәкилимиз, нә дә үрәјимизи сојудаҹағымыз парламентимиз олуб.
Үмумијјәтлә, Азәрбајҹан реаллығында Милли Мәҹлисә еһтијаҹ јохдур. Узагбашы вәтәндаша соған әкмәји, кәрпиҹ һөрмәји мәсләһәт ҝөрүрләр ки, буну мандат дашымадан да етмәк олар. Биз 23 илдир о мәҹлисдә халга ҝөрә ҝөз јашы төкән, халга ҝөрә ајағыны јерә дөјән, халга ҝөрә бармаг силкәләјән депутат ҝөрмүрүк. Әксинә, о мәҹлисдә ҹәримәләрин сәртләшдирилдијинин, олмајан инкишафа мәдһијјә дејилдијинин, мүртәҹе дәјишикликләрә көнүл верилдијинин шаһиди олмушуг. О 125 нәфәрин нә вахтса сессијадан хош хәбәрлә чыхдығынын, сечиҹинин үстүнә мүждәјлә ҝетдијинин шаһиди олмамышыг. Азәрбајҹан кими өлкәләрдә Президент Апараты варса, Милли Мәҹлисә, мәһкәмәјә, прокурорлуға еһтијаҹ јохдур. Һөкумәтимиз “өзүнәмәхсус” Асан хидмәт јарадыб вә бүтүн гәрарлар бир мәркәздән верилир. Азәрбајҹан халгы да баша дүшүр ки, о мәҹлисдә һеч вахт сүрприз олмајаҹаг. Кимсә маашларын галдырылмасыны, девалвасијанын вурдуғу зәрәрин өдәнилмәсини, ҝүнаһсыз инсанларын азадлыға бурахылмасыны, ири коррупсионерләрин ҹәзаландырылмасыны тәләб етмәјәҹәк.
Тәклиф едирәм ки, Президент Апаратында “депутатлар кабинети” јарадылсын вә 15 нәфәрдән ибарәт депутат сечилсин. Онлар да лазым оланда мүхалифәти сөјсүн, лазым оланда АБШ-ы ҹырмагласын, лазым оланда инкишафын пүскүрмәсиндән хәбәр версин вә.с
Валлаһ, бу чәтин вәзијјәтдә 23 милјон манаты Милли Мәҹлисә исраф еләмәк ҝүнаһды. Ҝәлин, һеч олмаса бөһран илләриндә парламенти гәнаәт едәк. Башга өлкәләрдә парламент дөвләтин сүтунудур, бу структурун варлығы өнәмлидир. Амма биз аналогсуз өлкәдә јашадығымыза ҝөрә Милли Мәҹлисимиз олмаса да кечинәрик.
О, әзәмәтли бинаны арендаја верәк, 23 милјону да халгын 23 дәрдинә дәрман тапмаға хәрҹләјәк. Биз Сијавушун, Һадинин, Ајдынын, Огтајын, Зијафәтин вә диҝәрләринин вәкиллијинә еһтијаҹ дујмуруг. 125 нәфәри бәсләмәкдәнсә, 9 милјонун ишғына, газына, сујуна әлаҹ един.
Сизи анд верирәм мандата, сәсимә сәс верин!
