Һөкумәтимизин исрафчылыгла “мүбаризә”си давам едир. “Гәнаәт режими”нә кечдикдән сонра исрафчылыг јувалары ашкар олунур вә исраф едәнләр ҹәзаландырылыр. Амма нә һикмәтдирсә, исрафчылыға гаршы мүбаризә әмәлијјатлары јалныз аҹ халгын үзәриндә апарылыр. Јәни, өзҝәсинин ҝөзүндә гыл ахтарсалар да, өз ҝөзләриндәки тири ҝөрә билмирләр.
Сон олараг исә исрафчылығын гаршысыны алмаг үчүн мәҹбури көчкүнләрә верилән “чөрәк пулу” үзәриндә әмәлијјата башладылар. Әввәлҹә гәрара ҝәлдиләр ки, јени доғулан көчкүн өвладларына “чөрәк пулу” верилмәсин, ардынҹа исә ҝүзәштләри ләғв едиб, ајда 36 манат мүавинәт вермәк гәрарына ҝәлдиләр.
Мүгәддәс мандаты лајигинҹә горујан Һади Рәҹәбли дә мәсәләјә ајдынлыг ҝәтириб. Һади мүәллимин “еврика”сы бундан ибарәтдир: “Биз мәҹбури көчкүнләрин јашадыглары евләрә ҝедирдик. Онлар ишыг спиралларындан истифадә едирдиләр. Сонра исә пәнҹәрәни ачыг гојурдулар”.
Бәли, исрафчылығын мәнбәји тапылыб вә дәрһал тәдбир ҝөрүлүб.
Мән узагҝөрән һөкумәтимзин сосиал сијасәтинә ағыз бүзмәк истәмирәм. Исрафчылығын гаршысынын алынмасы јахшы һалдыр. Амма бир нечә суал вар ки, ҹавабыны ахтармаг ваҹибдир.
Мәсәлән, Һади Рәҹәбли мәҹбури көчкүнләрин 40-50 манатлыг исрафчылығыны ҝөрә билирсә, мәмурларын милјардлыг исрафчылығыны нијә ҝөрмүр? Вәтәнәдашын пәнҹәрәни ачыг гојмасы бүдҹәјә зәрәрдирсә, өлкәнин гапыларынын дүнјанын үзүнә бағланмасы хејирдир?
1500-2000 манат әмәкһаггы алан мәмурун 15-20 милјонлуг виллада јашамасы, 200 минлик автомобилдә ҝәзмәси, сајсыз-һесабсыз објектләрә саһиб олмасы исрафчылыг дејил?
Неҹә олур ки, көчкүнүн спиралдан истифадә етмәси диггәти ҹәлб едир, амма өлкәнин спирал кими бурулдуғуну ҝөрән олмур?
Доғурдан да гәнаәт етмәк зәрурәти јараныбса, мәмурларын хидмәти автомобилләри ләғв олунсун, дүнјанын мүхтәлиф јерләриндә һәјата кечирилән хејријјә тәдбирләри дајандырылсын, саһибсиз јарышлара ев саһиблији етмәкдән әл чәкилсин вә.с
Амма бизим һөкумәтимизин проблемләрин һәллијлә бағлы “өз јолу” вар. Бунлар исрафчылыгла мүбаризәнин дә “Азәрбајҹан модели”ни тапыблар. Евинин пәнҹәрәсини ачыг гојанлары тәмбеһ едирләр, амма бүдҹәдән ҹибинә пәнҹәрә ачанлара “дур” дејән тапылмыр.
Көчкүнә верилән пула тамаһ салырлар, амма көчкүнә верилмәли олан јардымлары мәнимсәјәнләри вәзифәјә чәкирләр.
140 милјард нефт пулунун нәфәсини кәсдикдән сонра гәнаәт ешгинә дүшүбләр. Башда Һади Рәҹәбли олмагла, бүтүн команда үзвләринә хатырлатмаг истәјирик ки, проблем пәнҹәрәләрин бағланмамасы дејил, гапыларын ачылмамасыдыр. Пәнҹәрәни ачыг гојан вәтәндаш 50 манат исраф едирсә, гапыны бағлајанлар 50 милјардларын исрафына имза атырлар.
Исрафчылыг, өлкәнин гапыларыны вәтәндашын вә дүнјанын үзүнә бағлајыб, сәрвәтләри талан етмәкдир. Тәкҹә бу да дејил. Һөкумәт бүтүн имканлары, заманы, һәтта ҝәләҹәји исраф едиб.
Јәни, исрафчылығы көчкүнүн комасында јох, мәмурун вилласында ахтармаг лазымдыр.
