
Һөкумәтин нағылбазлығы давам едир. 2015-ҹи илә гәдәр аналогсуз инкишафдан данышдылар, “бәлкә бираз јавашлајаг” бәјанаты вердиләр, милјардлары һаваја совурдулар вә нағылын бу һиссәси битди. Ҝөјдән 3 алма дүшмәсә дә, башга нағыллара јенидән мүраҹиәт едибләр. Инди һөкумәтин ән “бренд” нағылы “сабитлик нағылы”ды. Һөкумәтин ән чох истинад етдији, бизә миннәт кими сырымағы чалышдығы сабитлик мөвзусудур.
Һәр дәфә дүнјадакы мүнагишә оҹагларыны ҝөз өнүнә ҝәтирирләр, “әсас одур ки, өлкәмиздә сабитлик вар” аргументиндән јапышырлар.
Бәс, әслиндә неҹәдир? Әслиндә, бу өлкәдә сабитлик чохдан позулуб. Суријада инсанлар топун- түфәнҝин гурбаны олур, Азәрбајҹанда исә биҝанәлијин, таланчылығын, һүгугсузлуғун гурбанына чеврилирләр. Минимум әмәкһаггынын 116 манат олдуғу өлкәдә сабитликдән данышмаг абсурддур. Инсанлар нормал гидалана, мүалиҹә олуна, тәһсил ала билмирләрсә, һансы сабитликдән данышырыг? Бир өлкәдә һәр ҝүн интиһара ҹәһд олунурса, бир өлкәнин һәбсханаларында јүзләрлә ҝүнаһсыз инсан варса, бир өлкәдә бир илдә10000 аилә дағылыбса, һансы сабитликлә өјүнүрүк?
İнсанларын сабаһа үмиди өлүбсә, арзулар үрәкләрдә һәбс олунубса, һансы сабитликдән сөһбәт ҝедә биләр?
Сәһијјә өлдүрүрсә, гидалар зәһәрләндирирсә, ганунлар шаһ дејилсә, сабитлик бу өлкәнин һарасындадыр?
Террорла, силаһла өлмүрүк, амма еһтијаҹлар батаглығында өлүрүк. Бу өлкәдә јүзминләрлә аиләнин сојудуҹусунда сабитлик позулуб. Минләрлә тәләбәнин тәһсил һәјатында сабитлик позулуб. Минләрлә инсанын сәһһәтиндә сабитлик позулуб.
Адамларын сабит шәкилдә өлмәсини, сабитлик адландырмаг олармы? Һөкумәт јашатмаг һаггында дүшнүмүр, даһа јахшы һәјата говушдура билмир вә ән ағыр вәзијјәти дә “сабитлик”лә сығорталамаг истәјир. Һансы китабда, һансы ганунда јазылыб ки, сабитлијә ҝөрә бүтүн писликләри гәбул етмәк лазымдыр?
Тәһсилин, сәһијјәнин, мәһкәмә системинин мәһв едилдији өлкәдә, сабитлијин һөкм сүрмәси мүмкүнсүздүр. Бу өлкәдә гејри-сабитлик өзүнә о гәдәр јер едиб ки, артыг нормаја чеврилиб. Өлкә вәтәндашына да бу “норма”ны сабитлик кими тәгдим едирләр. Сечки сахтакарлығы илә, коррупијајла, инһисарчылыгла барышан ҹәмијјәтә, ҝүллә сәсләринин ешидилмәмәсини сабитлик кими сырамаг мүмкүн олур. Азәрбајҹанда террор һадисәси баш вермир, амма МТН ҝенералы етираф едир ки, 800 нәфәрин “торбасыны тикиб”, һәбсә салыблар. Јәни, 800 аиләни башсыз гојублар, 800 инсан талејинин үстүндән хәтт чәкибләр, 800 ағыр ҹинајәт төрәдибләр. Һәлә бу бир нәфәрин етираф етдији фактдыр. Демәли. Өлкәдә јүзләрлә аилә сијаси террорун гурбанына чеврилиб. Нәтиҹә етибарилә һәјатлар мәһв едилибсә, сабитлијин һансы формада позулмасынын нә өнәми вар?
Бу өлкәдә јалныз сабит каррупсијадан, сабит монополијадан, сабит сахтакарлыгдан, сабит һүгугсузлугдан данышмаг олар.