Шрифт өлчүсү:
А+
А
А-
02 Феврал 2022

Рәҹәб ајы, ҹарчы мәләкин нидасы вә заһирдә дири олан өлүләр

Рәҹәб ајынын мүһүм мүрагибәтләрдән бири дә Рәсули-әкрәмдән (с) нәгл олмуш “Даи мәләк” һәдисини јада салмагдыр. Аллаһын Рәсулу (с) бујурду:

“Мүтәал Аллаһын једдинҹи сәмада “Даи” адлы бир мәләки вардыр. Рәҹәб ајы ҝәлиб чатдығы заман бу мәләк һәр ҝеҹә сәһәрә гәдәр дејир: Хош олсун, Аллаһа һәмд-сәна едәнләрин һалына. Хош олсун, Аллаһа итаәт едәнләрин һалына. Мүтәал Аллаһ бујурур: Мәнимлә һәмсөһбәт оланла Мән дә һәмсөһбәт оларам. Мәнә итаәт едән шәхсдән Мән дә итаәт едәрәм (истәкләрини јеринә јетирәрәм). Мәндән бағышланмаг истәјәни бағышлајарам. Ај Мәним ајым, бәндә Мәним бәндәм, рәһмәт Мәним рәһмәтимдир. Бу ајда Мәни сәсләјән һәр бир кәсин сәсинә сәс верәрәм. Мәндән истәјән һәр бир кәсә әта едәрәм. Мәндән һидајәт истәјән кәси һидајәт едәрәм. Бу ајы Өзүмлә бәндәләрим арасында ип гәрар вермишәм ки, ону тутан һәр бир шәхс Мәнә јетишәр.”
Əфсус олсун, Аллаһа итаәт етмәкдә сәһләнкарлығымыза! Һарададыр шүкүр едәнләр?! Һарададыр тәлаш едәнләр?! Һарададыр ағыл саһибләри?! Бу сәмави ниданын һаггыны дәрк етмәјә гадирдирләрми?! Нә үчүн ҹаваб ешитмирәм!? Һарададыр о арифләр ки, бу немәтин шүкрүнү јеринә јетирмәјә гадир олмадыгларыны билирләр!? Һарададыр өз аҹизлијинә вә сәһләнкарлығына етираф едән кәсләр ки, бу сәмави ҹарчынын ҹавабында десинләр: Гәбул етдик вә сәнә јардымчыјыг. Салам олсун сәнә еј ҹәлил вә ҹәмил, падшаһлар падшаһы, меһрибанларын ән меһрибаны, һәлим, кәрим, шәфгәтли рәфиг, бөјүк әфв саһиби, инсанын писликләрини јахшылыға чевирән Аллаһын ҹарчысы! Бунлар ҝүнаһкар, түғјанкар, фасиг, шәһвәт вә гәфләтләрә әсир бәндәләрдир. Еј Аллаһын әзиз елчиси! Заһирдә дири олан өлүләри чағырырсан! Онларын гәлбләри өлмүш, ағыллары ајрылмыш, руһлары фасид олмушдур! Нә үчүн өлүләри сәсләјирсән! Сәнин чағырышынын онлара фајдасы јохдур. Тәкҹә о вахт онлар үчүн фајда верәр ки, сәнин чағырышынла онларын гәлбләри дирилсин, ағыллары башларына гајытсын, руһлары ојансын, бу сәмави ниданын дәјәри, Аллаһын бөјүклүјү, нәфсин дәјәрсизлији, имтаһанын чәтинлији вә өз һалынын пислији һаггында дүшүнсүнләр. Онлар говулмаға, узаглашдырылмаға, ләнәт вә әзаба лајигдирләр. Лакин Рәббин ҝениш рәһмәти бу бөјүк дәвәтә сәбәб олмушдур. Өзү дә инсанын дүшүндүјүндән, истәк вә арзусундан даһа үстүн бу дил вә инҹә бәјанла.

Еј Мәбудун мәләки! Инди бу сәмави нида вә бөјүк лүтф васитәсилә Аллаһдан истәјирик ки, бизи бу ләтиф дәвәтә вә бөјүк кәрамәтә ҹаваб вермәјә мүвәффәг етсин...
Еј ҹарчы! Һәгир кәсләрин һал дили сәнә ҹаваб верир ки, бизә миннәт гојдун, әзәмәтли сәадәтә, уҹа мәгама дәвәт етдин. Бизим һәгирлијимиз, рәзил мәгамымыз, чиркин һалымыз, хәсис мәканымыз һара, Аллаһымызы тәсбиһ вә тәриф едә билмәјимиз һара! Торпаг һара, рәбләр рәбби һара! Чиркинликләрә булашмыш һара, пакларын мәҹлиси һара! Зәнҹирдә әсир олмуш һара, азадларын мәнзили һара? Лакин Рәббин лүтфү сәбәб олмушдур ки, бизә Өзүнү тәсбиһ етмәк иҹазәси версин. Онун һикмәти бизи бу тәклифлә шәрәфләндирмишдир. Әҝәр бу бөјүк бәхшишдән сонра Ону тәсбиһ етмәкдә сәһләнкарлыг етсәк, Она итаәт етмәкдә сүстлүк ҝөстәрсәк, бундан даһа бөјүк рүсвајлыг ола биләрми?! О, неҹә дә кәрим мөвла, биз неҹә дә һәгир бәндә; О неҹә дә һәлим Аллаһ, биз неҹә дә ағылсыз бәндә!

Аллаһ тәрәфиндән чатдырдығыны гәлбимизин гулағы илә ешитдик: “Мәнимлә һәмсөһбәт оланла Мән дә һәмсөһбәт оларам.” Һалбуки, бу сөзүн бөјүклүјү о тәклифә ҹаваб вермәкдә имкан аләминдә һәр бир дили лал едиб, бу кәрамәтин ҝөзәллији ағыл саһибләрини һејран гојуб. Әҝәр бу хитаба мүшәррәф оланларын һәр һансы бири бүтүн аләмләрдәкинин бәдәнинә, бүтүн руһ саһибләринин руһуна саһиб олсајды вә онларын һамысыны бу хитаба ҹаваба вермәк вә ону дәјәрләндирмәк үчүн фәда етсәјди, јенә дә бу хитабын һаггыны әда едә билмәзди, һәтта онун бир һиссәсинин шүкрүнү јеринә јетирә билмәзди...

Бундан да һејрәтли бир иш ола биләрми?! Һеч ҝөрмүсәнми ки, халиг мәхлугу өзү илә һәмсөһбәт олмаға дәвәт етсин, амма мәхлуг бу дәвәти гәбул етмәсин? Һалбуки, мөвла бәндәсинин мүнаҹатыны, онунла үнсијјәтдә олмағы севир, бәндә исә бу лүтфү гәбул етмәкдән имтина едир! Өз һалымызын пислијинә вә гәфләтләримизә тәәссүф, һәсрәт вә играр етмәклә дејирик: Бәли, еј бизим мәбудумуз, ағамыз вә еј бизим маликимиз вә мөвламыз! Сәнин төвфигин бизә нәсиб олса, бу дәвәтини гәбул етмәкдә инајәтин бизим һалымыза шамил олса, онда хош бизим һалымыза, хош бизим һалымыза! Бизи әзиз вә уҹа тутудуғун –неҹә ки, Сәнин кәрәминдән, камал вә бәхшишиндән јалныз бу ҝөзләнилир– дәвәтин васитәсилә өз арзуладығымыздан да бөјүк хошбәхтлик вә сәадәтә јетишәрик. Амма Сәнин төвфигин әлимиздән тутмаса вә инајәтин бизи Сәнә тәрәф чәкмәсә, онда вај бизим һалымыза! Елә олдугда бичарә вә бәдбәхт оларыг. Һаггын рәһмәтиндән узаг дүшмәк ҹәзасы илә нә едәрәм?
Она ҝөрә дә дејирик: Сәндән башга Аллаһ јохдур. Сәни тәсбиһ вә тәриф едирәм. Бизик зүлмкар. Илаһи, өзүмүзә зүлм етдик. Бизи бағышламасан вә рәһм етмәсән зијана уғрајанлардан олаҹағыг. Чарәсизликдән даһа чох ҹүрәт едиб өз зилләт вә харлығымызы үзә чыхарараг бөјүк андларла ону тәкид едиб дејирик: Сәни анд веририк иззәт вә ҹәлалына, еј бизим Рәббимиз! Өз төвфигинлә бизи горумасан вә Өз лүтфүнлә бизә јахшылыг етмәсән, Сәнин ҝөстәришләриндән бојун гачырмала өзүмүзү һәлак едирик, Сәнә гаршы үсјан едирик вә мәһв олуруг. Чүнки Сәнин јардымындан башга һеч бир ҝүҹ вә гүввә јохдур...

Инди еј Пәрвәрдиҝар! Биз Сәнин мәғфирәтинә вә дәрдли әзабындан хилас олмаға мөһтаҹыг. Имкан аләминдә бундан да артыг дарда галмаг јохдур. Еј Ғәффар! Бизим әлимиздән тут, һалак олмаг бурулғанындан, зијанкарларын сүгутундан хилас ет. Неҹә ки, ај Сәнин ајын, бәндә Сәнин бәндән вә рәһмәт Сәнин рәһмәтиндир. Сәнин гуртулуш ипиндән јапышмаг да Сәнин тәрәфиндән олан төвфиг илә мүмкүндүр. Чүнки бүтүн хејирләр Сәндәндир вә Сәндән гејрисиндә тапылмаз...

Дүздүр ки, үзүмүз гарадыр, амма Сәнин јанында үзләри нур сачан пак достларын васитәсилә Сәнә үз тутуруг. Дүздүр ки, үрәкләримиз гаралмышдыр, амма Сәни таныјан ариф бәндәләринин нурундан нур алырыг. Дүздүр ки, дүнјасевәрлик гәлбләримизи хәстәләндириб вә ағылларымызы мәһв едиб, амма Сәнин өвлијаларына севҝи ону дирилдиб. Әҝәр Сәнин лүтфүн тәвәссүл едән бәндәләрдә лүтф вә кәрәмин васитәсилә ашкар олурса, онларын лүтфү, онлара севҝи бәсләмәклә тәвәссүл едән вилајәт әһлиндә дә заһир олмасынын нә ирады вардыр?
Бәс, бу ҹүзи нисбәт Сәнин әфв әтәјиндән, Сәнин вә достларынын лүтф вә кәрәм ипиндән јапышмаг үчүн бизә бәсдир. Она ҝөрә дә лүтф вә инајәтинә, достларын Мәһәммәд вә Али-Мәһәммәдә хатир онлара (Мәһәммәд вә Али-Мәһәммәдә) сонсуз салават ҝөндәр. Елә бир салават ки, онун васитәсилә бизим ҝүнаһларымызы бағышлајасан, ејбләримиз ислаһ едәсән, ағыл вә нурумузу онунла камил едәсән, Өзүнү вә онлары бизә таныдасан, бизи Өзүнә вә онлара јахын едәсән.
2604 дәфә бахылыб
Лоадинҝ ...
Nur-Az Xeber
Go to TOP