Məhərrəm ayının müraqibətləri – Üçüncü hissə

Məhərrəmin birinci gününün əməlləri

İmam Rzadan (ə) rəvayət olunmuşdur ki, Rəsuli-əkrəm (s) Məhərrəm ayının birinci günü iki rəkət namaz qılırdı. Sonra əllərini qaldırıb bu duanı üç dəfə oxuyurdu:

اللّٰهُمَّ أَنْتَ الْإِلٰهُ الْقَدِيمُ، وَهٰذِهِ سَنَةٌ جَدِيدَةٌ، فَأَسْأَلُكَ فِيهَا الْعِصْمَةَ مِنَ الشَّيْطانِ وَالْقُوَّةَ عَلَىٰ هٰذِهِ النَّفْسِ الْأَمَّارَةِ بِالسُّوءِ وَ الاشْتِغالَ بِما يُقَرِّبُنِى إِلَيْكَ يَا كَرِيمُ ، يَا ذَا الْجَلالِ وَالْإِكْرامِ، يَا عِمادَ مَنْ لا عِمادَ لَهُ ، يَا ذَخِيرَةَ مَنْ لا ذَخِيرَةَ لَهُ ، يَا حِرْزَ مَنْ لَاحِرْزَ لَهُ، يَا غِياثَ مَنْ لَاغِياثَ لَهُ، يَا سَنَدَ مَنْ لَاسَنَدَ لَهُ، يَا كَنْزَ مَنْ لَاكَنْزَ لَهُ، يَا حَسَنَ الْبَلاءِ ، يَا عَظِيمَ الرَّجاءِ، يَا عِزَّ الضُّعَفاءِ، يَا مُنْقِذَ الْغَرْقىٰ، يَا مُنْجِىَ الْهَلْكَىٰ، يَا مُنْعِمُ يَا مُجْمِلُ يَا مُفْضِلُ يَا مُحْسِنُ؛
أَنْتَ الَّذِى سَجَدَ لَكَ سَوادُ اللَّيْلِ ، وَنُورُ النَّهارِ، وَضَوْءُ الْقَمَرِ، وَشُعاعُ الشَّمْسِ، وَدَوِىُّ الْماءِ ، وَحَفِيفُ الشَّجَرِ، يَا اللّٰهُ لَاشَرِيكَ لَكَ. اللّٰهُمَّ اجْعَلْنا خَيْراً مِمَّا يَظُنُّونَ، وَاغْفِرْ لَنا مَا لَايَعْلَمُونَ، وَلَا تُؤاخِذْنا بِما يَقُولُونَ، حَسْبِىَ اللّٰهُ لَا إِلٰهَ إِلّا هُوَ عَلَيْهِ تَوَكَّلْتُ، وَهُوَ رَبُّ الْعَرْشِ الْعَظِيمِ، آمَنَّا بِهِ كُلٌّ مِنْ عِنْدِ رَبِّنا وَمَا يَذَّكَّرُ إِلّا أُولُوا الْأَلْبابِ، رَبَّنا لاتُزِغْ قُلُوبَنا بَعْدَ إِذْ هَدَيْتَنا وَهَبْ لَنا مِنْ لَدُنْكَ رَحْمَةً إِنَّكَ أَنْتَ الْوَهَّابُ.

“Əllahummə əntəl ilahul qədimu və hazihi sənətun cədidəh. Fəəsəlukə fihəl-ismətə minəş-şəytani vəl-quvvətə əla hazihin-nəfsil əmmarəti bis-sui vəl-iştiğalə bima yuqərribuni iləykə (ya kərimu,) ya zəl-cəlali vəl-ikrami, ya imadə mən la imadə ləhu, ya zəxirətə mən la zəxirətə ləhu, ya hirzə mən la hirzə ləhu, ya ğiyasə mən la ğiyasə ləhu, ya sənədə mən la sənədə ləhu, ya kənzə mən la kənzə ləhu, ya həsənəl-bəlayi, ya əzimər-rəcai, ya izzəz-zuəfai, ya munqizəl-ğərqa, ya munciyəl-həlaka, ya munimu, ya mucmilu, ya mufzilu, ya muhsin. Əntəlləzi səcədə ləkə səvdaul-ləyli və nurun-nəhari və zəvul-qəməri və şuauş-şəmsi və dəviyyul-mai və həfifuş-şəcər. Ya Əllahu la şərikə lək. Əllahumməcəlna xəyrən mimma yəzunnunə vəğfir ləna ma la yələmun. Və la tuaxizna bima yəqulun. Həsbiyəllahu la ilahə illə huvə ələyhi təvəkkəltu və huvə rəbbul-ərşil-əzim. Amənna bihi kullun min indi rəbbina və ma yəzzəkkəru ill ulul-əlbab. Rəbbəna la tuziğ qulubəna bədə iz hədəytəna və həb ləna min lədunkə rəhmətən innəkə əntəl-vəhhab.”

Müstəhəbdir ki, müraqib bəndə bütün Məhərrəm ayını oruc tutsun. Lakin ehtiyat odur ki, Aşura günü oruc tutmasın. Bununla belə, həmin gün axşamüstünə qədər yemək-içməkdən çəkinsin və axşamüstü bir şey yesin. Çünki bu vaxt İmam Hüseyn (ə) və onun vəfalı səhabələri bu dəyərsiz dünyanın qəmindən xilas oldular, səadətə və Allah-Təala ilə görüş olan arzularına çatdılar. Bəlkə də ona görədir ki, Aşura günü əsr vaxtı İmam Hüseyn (ə) əzadarlarının qəm və kədəri azalır. Çünki İmam Hüseyn (ə) və səhabələri həmin saatlarda həqiqi səadətə nail oldular və öz məqsədlərinə çatdılar.

Rəyyan ibn Şəbib deyir: “Mən Məhərrəm ayının birinci günü İmam Əli ibn Musa Rzanın (ə) yanına getdim.

Həzrət buyurdu: - Ey Şəbibin oğlu! Oruc tutmusan?
Dedim: - Xeyr! Həzrət buyurdu: - Bu gün elə bir gündür ki, Zəkəriyya peyğəmbər Rəbbinə dua edərək dedi: “Ey Rəbbim! Öz tərəfindən mənə pak övlad əta et ki, həqiqətən, Sən duanı eşidənsən.”

Allah-Təala Zəkəriyya peyğəmbərin duasını qəbul etdi. O, ibadət mehrabında namaz qılıb, razü-niyazla məşğul olarkən mələklər ona müraciət edib dedilər: “Allah səni Yəhya (adlı bir övlad) ilə müjdələyir.”
- Ey Şəbibin oğlu! Hər hər kim bu günü (Məhərrəm ayının birinci günü) oruc tutub Allahdan istək və hacətlərini diləsə, Allah-Təala Zəkəriyyanın duasını qəbul etdiyi kimi, onun da istək və hacətlərini qəbul edər.

Sonra İmam (ə) buyurdu: - Məhərrəm bir aydır ki, keçmişdə cahillik dövrünün insanları bu aya ehtiram edərək döyüşü tərk edir, hətta onu haram bilirdilər.

Amma bu ümmət bu ayın, eləcə də, öz Peyğəmbərinin (s) ehtiramını saxlamadılar. Bu ayda onun övladını qətlə yetirdilər, əhli-əyalını və qadınlarını əsir etdilər, onların xeymələrinə od vurdular, malımızı qarət etdilər. Allah onları heç zaman bağışlamasın!

- Ey Şəbibin oğlu! Əgər ağlasan, Hüseyn ibn Əli ibn Əbu Talib (ə) üçün ağla. Onun başı qoç başı kimi kəsilib və onunla birlikdə ailəsindən on səkkiz kişini də şəhid etdilər. Bu öldürülənlərin yer üzündə bənzəri yox idi. Onların şəhadətində yeddi göy və yer ağladı. Aşura günü dörd min mələk o həzrətə köməyə gəldilər, lakin artıq o həzrət şəhid olmuşdu. Ona görə də qəm-qüssəli və pərişan halda onun pak qəbrinin ətrafına məskunlaşdılar ki, həzrət Qaim (əc) zühur edəndə qiyama qalxsınlar. Onlar həzrət Məhdinin (əc) köməkçilərindən olacaq və şüarları “Ya ləsaratəl-Hüseyn”dir.

- Ey Şəbibin oğlu! Atam mənə öz atasından və o da babasından hədis nəql etdi ki, cəddim Hüseyn (ə) şəhid olduqda göydən qan və qırmızı torpaq yağdı.
- Ey Şəbibin oğlu! Əgər Hüseyn (ə) üçün göz yaşın yanaqlarına axan qədər ağlasan, Allah kiçik və böyük, az və çox bütün günahlarını bağışlayacaq.
- Ey Şəbibin oğlu! Əgər Allahla günahın olmadığı halda görüşmək istəyirsənsə, Hüseyni (ə) ziyarət et.
- Ey Şəbibin oğlu! Əgər cənnətdə tikilmiş otaqlarda Allahın Rəsulu (s) və onun ailəsi ilə birlikdə olmaq istəyirsənsə, Hüseynin (ə) qatillərinə lənət oxu.
- Ey Şəbibin oğlu! Əgər Aşura gününün şəhidlərinin savabına nail olmaq istəyirsənsə, hər vaxt İmam Hüseyni (ə) xatırlasan de: “Ey kaş, mən də sizinlə birlikdə olaydım və sizin nail olduğunuz böyük feyzə çataydım.”

- Ey Şəbibin oğlu! Əgər biz Əhli-beyt ilə birlikdə cənnətin yüksək dərəcələrində olmaq istəyirsənsə, bizim qəmli günlərimizdə qəmli ol, şad günlərimizdə şad ol və həmişə bizim vilayətimizi qəbul et. Çünki əgər bir şəxs bir daşı da sevsə, Allah-Təala qiyamət günü onu həmin daşla məşhur edəcək. (“Uyunu Əxbarur-Riza (ə)”, c. 1, səh.399; “Əmali”, Şeyx Səduq, səh.190.)

Mirzə Cavad Ağa Məliki Təbrizi, “Əl-Muraqibat” kitabının tərcüməsi, səh. 40-41.

2106 dəfə baxılıb

Şərhlərə bax və Şərh yaz