Сиз ҝүман едирсиниз ки, мәнә атамдан ирс ҹатмыр, јохса мәнимлә атам арасында бир рабитә мөвҹуд дејил? Аллаһын сизин һаггынызда ајәси вар, мәним атам истисна олунуб?! Еј ибн Әбу Гәһафә, Фәдәкин ҹиловуну әлинә ал, гијамәт ҝүнү ҹаваб верәрсән. Аллаһ ҝөзәл һакимдир!
...Ханым Зәһра (с) Аллаһа һәмд-сәнадан, әгидә үсулунун бәјанындан, бәзи һөкмләри садаладыгдан сонра инсанларын өһдәсиндәки илаһи әманәти јада салды. Сонра сәгифә һадисәсини, хилафәтин гәсб олунмасыны, Исламын һәгиги јолдан бүдрәмәсини тәнгиди шәкилдә ортаја гојду. Фәдәк мөвзусуна гајыдыб Фәдәји гәсб едәнләри рүсвај едәҹәк ајәләр охуду. Сонда Әнсара үз тутараг онлара сон хәбәрдарлыг етди:
Еј алиҹәнаб инсанлар, еј динин вә шәриәтин ҝүҹлү голлары! Сиз Исламы мүһафизә едәрдиниз. Бәс неҹә олду ки, мәним һаггыма мүнасибәтдә сиздә сүстлүк ҝөрүндү? Мәнә зүлм олунанда јухујамы ҝетдиниз? Атам Пејғәмбәр (с) бујурмамышдымы ки, бир шәхсә һөрмәти онун өвладларына һөрмәтлә горујарлар? Нә тез дәјишдиниз, нә тез бурнунуз овулду! (Ханым Фатимә (с) бу сөзләри кинајә илә дејирди. Ишарә едирди ки, ја јолунузу азмысыныз, ја да мүдафиә ҝүҹүнүз јухдур.) Мәним сиздән истәдијим ишә ҝүҹүнүз вар, ҝүҹүнүзү итирмәмисиниз. Дејирсиниз ки, Пејғәмбәр (с) өлдү, һәр шеј сона чатды. Бәли, Пејғәмбәрин (с) реһләти бөјүк мүсибәт иди. Һәзрәтин (с) вәфаты илә ағыр сүстлүк, бөјүк парчаланмалар јаранды. Бағлылыглар позулду. Пејғәмбәрин дүнјасыны дәјишмәси илә торпаға зүлмәт чокдү, ҝүнәш вә ај гаранлыға чәкилди. Арзулар үмидсизлијә дөндү. Дағларын гәдди әјилди, Пејғәмбәр (с) һәрими дағылды. Пејғәмбәр (с) дүнјасыны дәјишән заман она гаршы һөрмәтсизлик едилди. (Ханым Фатимә (с) өлүм јатағында Пејғәмбәрин (с) кағыз-гәләм истәмәсинә мәһәл гојулмамасына вә Пејғәмбәрин (с) ҹәназәси ортада икән онун гызынын гапысына од вурулмасына ишарә едирди.) Анд олсун Аллаһа! Бу һадисәләрә охшајан мүсибәт олмајыб. Бу фаҹиә Аллаһын китабында, өзү дә уҹа сәслә сизә билдирилиб. Гуран сизә хәбәр вериб ки, илаһи пејғәмбәрләрин башына неҹә мүсибәтләр ҝәлиб. Онларын өлүмү илаһи тәгдирдир, Ислам Пејғәмбәринин (с) дә өлүмүнүн гаршысыны алмаг олмазды. Аллаһ бујурур ки, Мәһәммәд (с) Аллаһын рәсулудур, ондан габаг да пејғәмбәрләр олуб. Бу пејғәмбәрләр дүнјасыны дәјишәндә, гәтлә јетириләндә сиз ҹаһилијјәтә гајытмалысыныз?! Билин ки, сизин ҹаһилијјәтә гајыдышыныз Аллаһа зәрбә вурмаз. Аллаһ мөһкәм дајанан вә шүкүр едәнләри мүкафатландырар.
Еј Гилә өвладлары! (Овс вә Хәзрәҹ Гилә адлы гадынын өвладлары идиләр) Сиз мәни ҝөрдүјүнүз, сәсими ешитдијиниз, бир јердә олдуғумуз заман атамын ирсиндән мәһрум едилим?! Сиз һамыныз бу мәсәләдән хәбәрдарсыныз. (Ханым Фатимә (с) јада салыр ки, Пејғәмбәрин (с) вәфатындан сонра Әли (ә) илә бирликдә бу инсанлары вәзифәләринин иҹрасына дәвәт едиб.) Сизин ҝүҹүнүз, силаһыныз, сипәриниз вар. Нә гәдәр чағырырамса ҹаваб вермирсиниз. Фәрјадым сизә чатыр, амма сусурсунуз. Сиз өз ҹәнҝавәрлијиниз вә хејир ишләринизлә танынмысыныз. Бу сифәтләринизә ҝөрә хејирли сајылараг биз Әһли-бејт (ә) үчүн сечилмисиниз. Сиз Пејғәмбәр (с) вә Аллаһын дининин мүдафиәси јолунда әрәб башчылары илә вурушдунуз, чәтинликләрә дөздүнүз, дүшүнҹәсиз гөвмләрлә мүбаризә апардыныз. Биз вә сиз белә олмушуг. Биз әмр едәрдик, сиз јеринә јетирәрдиниз. Бизим васитәмизлә Ислам һәрәкәт едәр, дөврүн бәрәкәти ҹәрәјанда оларды. Ширкин буруну овулду, ширк зәлил едилди. Јалан вә фырылдаг түғјаны, күфр алову јатырылды. Фитнә далғалары сакитләшди, илаһи һөкумәт гурулду.
Бүтүн бунлардан сонра сизә нә олуб? Сиз һаггы бәјан едәндән сонра ону ҝизләдиниз. Аддым атандан сонра ҝеријә гајытдыныз, иман ҝәтирәндән сонра мүшрик олдунуз. Вај о гөвмүн һалына ки, әһд-пејман бағлајандан сонра ону позду. Гәрар чыхардылар ки, Пејғәмбәри (с) Мәдинәдән узаглашдырсынлар. Сизә гаршы онлар фитнәкарлыға башлады. Онлардан горхурсунуз? Әҝәр мөминсинизсә, Аллаһдан горхмағыныз даһа јахшыдыр. (Јәһудиләр Пејғәмбәри (с) мәдинәдән чыхармаг истәјирдиләр. Индики вәзијјәтдә исә
Пејғәмбәрин (с) ҹанишинини, әслиндә Пејғәмбәрин (с) өзүнү сәһнәдән чыхарырдылар.
Ҝөрүрәм ки, сиз раһатчылыг, хош јашамаға алудә олмусунуз. Сиз Ислам һөкүмәтини идарә етмәјә ҝүҹү чатан, Ислам өлчүләри вә ганунларыны билән, Аллаһ тәрәфиндән сечилән бир шәхси сәһнәдән кәнарлашдырдыныз. Сиз раһатчылығы сечдиниз. Асајиш вә раһатлыға чәкилдиниз. Өз сечдијиниз бир шеји кәнара атдыныз. Санки једијиниз ләзиз хөрәји гусуб гајтардыныз. (Һәгигәти гәбул етмишдиниз амма чәтинлијә дөзмәјән ҹисиминиз она таб ҝәтирмәјиб ҝери гајтарды.) Сиз вә бүтүн јер үзүндә оланлар кафир олса Аллаһ һамыныздан еһтијаҹсыздыр.
Мән билдијим сөзләри дедим. Билирдим ки, сөзүм сизә тәсир етмәјәҹәк. Раһат јашајыш сорағындасыныз, вәфасызлығы либас кими ҝејинмисиниз, гәлбләриниз она бүрүнүб. Бу сөзләри руһумун тәлатүмүнә ҝөрә дедим. Гәлбим јанырды. Гәм-гүссә синәми парчалајырды. Дедим ки, хәбәрдарлығы баша чатдырым. Ону ҝөтүрүн (хилафәт вә Фәдәк) мөһкәм бағлајын, билин ки, бу минијин бели јара, ајағы ахсагдыр. Онун рүсвајчылығы әбәдиликдир. Аллаһын гәзәби даим онун үзәриндәдир. Бу миник сизи гәлбләри әһатә едән илаһи алова чатдыраҹаг. Билин ки, ишиниз Аллаһын нәзәриндәдир. Залымлар тезликлә агибәтләрини анлајаҹаглар. Мән сизин Пејғәмбәрин (с) гызыјам. Пејғәмбәр сизә хәбәрдарлыг үчүн әзаблардан кечди. Сиз истәдијинизи един, биз дә вәзифәмизи јеринә јетирәҹәјик. Сиз ҝөзләјин, биз дә ҝөзләјирик.
Мәтн Ајәтуллаһ Мүҹтәба Теһранинин дәрсләриндән ҝөтүрүлүб.
Vilayet.nur-az.com
