Аллаһ Өзү бујурур ки, «Аллаһ јолунда өлдүрүләнләри, шәһид оланлары, һеч дә өлү зәнн етмә!
Ханым Зејнәб (сәламуллаһи әлејһа) сон дәрәҹә мәтанәт, шүҹаәт вә вүгарла сөзә башлајыб Језидә хитаб едәрәк белә бујурду: «Аллаһ вә Онун Пејғәмбәри доғру бујурмушлар ки, пис әмәл саһибләринин агибәти будур ки, Аллаһын ајәтләрини јалан сајыб онлара ришхәнд едәрләр.
Језид, белә фикирләширсән ки, јери-ҝөјү бизә даралтмагла, бизи әсирләр кими бу шәһәрдән о шәһәрә апармагла бизи рүсвај едиб өзүнү һөрмәтләндирдин? Елә билирсән ки, бу ишинлә јүксәк мәгама наил олуб она-буна тәкәббүрлүк едирсән? Гүдрәтин һазыр олуб һакимијјәтини сәлигә-саһманда ҝөрдүкдә, севинҹиндән дәринә сығышмырсан. Билмирсән ки, сәнә верилән бу фүрсәт ондан өтрүдүр ки, әсл һәгигәтини, ич үзүнү ҹамаата ачыб ҝөстәрәсән? Мәҝәр Аллаһын «Күфр едәнләр онлара вердијимиз мөһләти һеч дә өзләри үчүн хејирли санмасынлар! Бизим онлара вердијимиз мөһләт анҹаг ҝүнаһларыны даһа да артырмалары үчүндүр. Онлар зәлиледиҹи бир әзаб ҝөрәҹәкләр» дејә бујурдуғуну унутмусан?
Еј азад едилмишләрин оғлу! Һеч бу әдаләтдирми ки, сәнин гадын, гыз вә кәнизләрин пәрдә архасында отурсун, анҹаг сән Пејғәмбәрин гызларыны әсир едәсән, онларын һөрмәт пәрдәсини парчалајасан, онларын сәсләрини боғазларында боғасан вә јад (намәһрәм) кишиләр онлары дәвәләрлә о шәһәрдән бу шәһәрә доландырсынлар? Һеч әдаләтдәндирми ки, кимсә онлара јер вермәсин, кимсә онлары горумасын вә өз кишиләриндән һеч бири онларын јанында олмасын?
Ахы үрәји бизим һирс вә гәзәбимиздән долу олан бир шәхсдән бундан артыг нә ҝөзләмәк олар? Дејирсән ки, каш Бәдр дөјүшүндә өлән әҹдадын инди бурада олсајды вә буну дејәрәк Пејғәмбәр баласынын дишләринә вурурсан? Нә үчүн дә етмәјәсән? Сән јер үзүнүн улдузлары олан Пејғәмбәр балаларынын вә Әбдүлмүттәлиб аиләсинин ганыны төкмәклә ики нәсил арасында олан дүшмәнчилији јенидән бәрпа етдин. Севинмә! Тезликлә Аллаһ дәрҝаһында һазыр олаҹагсан. Һәмән ҝүн арзулајаҹагсан ки, каш кор, лал олајдын вә бу ҝүнү ҝөрмәјәјдин, каш «инди әҹдадым бу мәҹлисдә олсајды, севинҹләриндән дәриләринә сығмаздылар» демәјәјдин. Илаһи, бизә зүлм едән шәхсдән Өзүн һагг вә интигамымызы ал!
Анд олсун Аллаһа, Пејғәмбәр, онун Әһли-бејти вә ҹијәрпаралары Аллаһын лүтф-мәрһәмәтиндә гәрар тапаҹаглары ҝүн (Гијамәт ҝүнү) Сән Аллаһ гаршысында өз әтини-дәрини дидиб-дағыдаҹагсан. Аллаһ Өз вәдәсинә әмәл едәҹәји ҝүн күнҹ-буҹагда галмыш бу мәзлумлары бир јерә јығаҹаг. Аллаһ Өзү бујурур ки, «Аллаһ јолунда өлдүрүләнләри, шәһид оланлары, һеч дә өлү зәнн етмә! Хејр, онлар өз Рәббинин јанында дири олуб рузи -Â Ҹәннәт рузиси -Â јејирләр.» Анҹаг сәни наһагдан мүсәлманларын бојнунда отуздуран шәхс (Мүавијә) әдаләт, Аллаһ мәһкәмәси, Мәһәммәд (сәлләллаһу әлејһи вә алиһ) вә сәнин өз әл-ајағын сәнин ҹинајәтләринә шәһадәт верәҹәји ҝүн биләҹәк ки, сизләрдән һансыныз даһа бәдбәхтсиниз.
Језид, еј Аллаһын дүшмәни вә Аллаһ дүшмәнинин оғлу! Анд олсун Аллаһа, сән мәним ҝөзүмдә елә дәјәрли дејилсән ки, мән сәни данлајам, (јәни сәнин һеч данланмаға да ләјагәтин јохдур) сәнин һеч тәһгир олунмаға да ләјагәтин јохдур. Анҹаг нә едим, јаш ҝөзләримдә һәлгәләниб, аһ-налә синәмдә фәган едир. Һүсејн (әлејһиссәлам) өлдүрүлдүкдән сонра, Шејтан ордусу Пејғәмбәр аиләсинин һөрмәтини гырмагла мүсәлманларын бејтүл-малындан мүкафат алмаг үчүн бизи Куфәдән ағылсызлар мәмләкәтинә ҝәтирдикдән сонра, бу ҹәлладларын әли бизим ганымыза сираб олдугдан сонра, аҹ гурдлар пак ҹәназәләрин үстүндә ат чапдыгдан сонра сәни данламаг, тәнә етмәк һансы дәрдә мәлһәм олар? Әҝәр бизи өлдүрүб әсир етмәклә хејир газандығыны ҝүман едирсәнсә, тезликлә баша дүшәҹәксән ки, газандығын зијандан башга бир шеј дејил. Гијамәт ҝүнү ҝөрдүјүн ишин нәтиҹәсиндән башга һеч нә газанмајаҹагсан. О ҝүн сән ибн Зијады өз көмәјинә чағыраҹаг, ибн Зијад да сәндән көмәк истәјәҹәк. Сән вә сәнин јолуну ҝедәнләр һәмән ҝүн Аллаһын әдаләт мәһкәмәсиндә јығышаҹаг, онда биләҹәксән ки, Мүавијәнин сәнин Ахирәт сәфәрин үчүн һазырладығы ән јахшы тәдарүк Пејғәмбәр балаларыны өлдүрмәјин олуб. Анд олсун Аллаһа ки, мән Аллаһдан башга һеч кимдән горхмур вә Ондан башга һеч кәсә шикајәт етмирәм! Һәр нә истәјирсән, елә! Һәр нә һијлән вар, истифадә ет! Һәр нә дүшмәнчилијин вар, ҝөстәр! Аллаһа анд олсун, сәнин адына јапышан бу ләкә һеч вахт силинмәјәҹәк. Аллаһа шүкүрләр олсун ки, Ҹәннәт ҝәнҹләринин ағасынын (Имам Һүсејнин) агибәтини сәадәтлә нәтиҹәләндирди вә Беһишти онлара ваҹиб етди. Аллаһдан истәјирәм ки, онларын мәгамыны даһа да уҹалтсын вә Өз рәһмәтини онлара даһа чох шамил етсин. Аллаһ баҹарыглы һимајәдар вә јахшы көмәкчидир.» (Бәлағатун-ниса, сәһ.12-23.)
