Беш адамјејән бир идарәдә ишә дүзәлир. Онларын идарәјә ҝәлиши илә тәшкил олунмуш мәрасимдә идарәнин мүдири дејир: Сиз дә бизләрдәнсиниз. Сиз бурада јахшы мааш алаҹагсыныз вә истәдијиниз вахт ширкәтин јемәкханасына ҝедиб истәдијиниз гәдәр јемәк јејә биләрсиниз. Одур ки, диҝәр ишчиләри јемәк барәсиндә гәти шәкилдә фикирләшмәјин.
Адамјејәнләр сөз верирләр ки, идарәнин ишчиләри илә һеч бир ишләри олмајаҹаг. Дөрд һәфтә сонра идарә мүдири онлара баш чәкмәјә ҝәлир вә дејир: Билирәм ки, сиз һамыныз чох чәтин, чох ағыр ишләр ҝөрүрсүнүз, мән сизин һамыныздан разыјам. Лакин бизим тәмизләјиҹиләрдән бири јоха чыхыб. Сизләрдән һансы биринизсә онун башына нә ҝәлдијини билирми? Адамјејәнләр бу барәдә һеч нә билмәдикләрини дејирләр. Идарә мүдири ҝедәндән сонра, адамјејәнләрин башчысы обириләриндән сорушур: Һансы ахмаг о тәмизләјиҹини јејиб? Адамјејәнләрдән бири икраһла әлини јухары галдырыр. Башчылары дејир: Еј ахмаг! Биз бу дөрд һәфтә әрзиндә прожеләрин мәсул шәхсләрини вә мүдирләрини јемишик вә һеч кәс һеч нә билмәјиб, сән исә о тәмизләјиҹини јејибсән вә мүдир бундан хәбәрдар олуб?! Бундан сонра лүтфән иш ҝөрән шәхсләри јемәјин.
***
Ҝүнләрин бир ҝүнү Лоғман оғлуна дејир ки, бу ҝүн сәнә хошбәхт олмағын үчүн үч нәсиһәт верәҹәјәм. Биринҹиси бундан ибарәтдир ки, һәјатында дүнјанын ән дадлы јемәјини јемәјә чалыш! Икинҹиси будур ки, чалыш дүнјанын ән јахшы јатағында јатасан!
Үчүнҹүсү исә будур ки, дүнјанын ән ҝөзәл сарајларында, евләриндә јаша!
Лоғманын оғлу дејир: Еј ата, биз јохсул бир аиләјик, мән бу ишләри неҹә јеринә јетирә биләрәм?
Лоғман ҹаваб верир:
Әҝәр чох аҹдыгдан сонра јесән, једијин һәр бир јемәк дүнјанын ән дадлы хөрәјинин дадыны верәҹәк.
Әҝәр чох ишләјиб, бир гәдәр ҝеҹ јатсан, һарада јатсан елә һисс едәҹәксән ки, дүнјанын ән ҝөзәл јатағындасан.
Әҝәр инсанларла дост олсан вә онларын гәлбиндә өзүнә јер тапсан, бу заман дүнјанын ән ҝөзәл евләри сәнин олаҹаг...
***
Дүнја әтрафына сәјаһәтә чыхан бир шәхс танынмыш бир заһиди зијарәт етмәк үчүн бир кәндә ҝедир. Заһидин садә бир отагда јашадығыны ҝөрүр, отаг китабла долу иди вә бу китаблардан башга отагда јалныз бир миз вә бир отураҹаг вар иди.
Сәјаһәтчи заһиддән сорушур: Бәс сизин ев әшјаларыныз һарададыр?
Заһид дејир: Бәс сәнинкиләр һардадыр? Сәјаһәтчи ҝүлүмсәјиб дејир: Ахы мән сәфәрдәјәм?!
Заһид дејир: Мән дә!
***
Бир ҝүн бир шәхс дәниздә боғулмагда олан бир ҹаваны хилас етмәк үчүн өз ҹаныны тәһлүкәјә атыр. Вәзијјәт о гәдәр тәһлүкәли иди ки, һамы елә фикирләширди ки, онларын һәр икиси боғулуб өләҹәк. Әҝәр дәниздә батмасалар да, гајалара дәјиб парча-парча олаҹаглар. Лакин һәмин шәхс чох зәһмәтлә ҹаваны хилас едир. Хиласедиҹи шәхс јорғун вә јаралы һалда оғланы ән јахын гаја парчасына чатдырыр вә һәр икиси гајанын үзәринә чыхыр. Бир гәдәр кечдикдән сонра, онларын һәр икиси өзүнә ҝәлир вә оғлан үзүнү ону хилас едән кишијә тутуб дејир: “Мәни хилас етмәк үчүн өз ҹаныны тәһлүкәјә атдығына ҝөрә тәшәккүр едирәм.” Киши белә ҹаваб верир: Тәшәккүр етмәјә еһтијаҹ јохдур. Јалныз чалыш елә јашајасан ки, һәјатын ону хилас етмәјә дәјсин!
***
Дејирләр ки, бир ҝүн бир падшаһ дүнјада ән мурдар шејин нә олдуғуну билмәк истәјир. Бу иш үчүн вәзиринә тапшырыг верир вә билдирир ки, әҝәр бунун нә олдуғуну өјрәнә билсә, јахуд буну билән һәр бир шәхсә бүтүн тахт-таҹыны верәҹәк.
Вәзир бу мәгсәдлә сәфәрә чыхыр, бир ил ахтарыш апарыр, мүхтәлиф шәхсләрдән бу барәдә мәлумат алыр вә бу нәтиҹәјә чатыр ки, елә дүнјада ән мурдар шеј инсанын нәҹисидир. Вәзир ҝеријә гајыдыр, өз мәмләкәтинә јахынлашанда шәһәрин јахынлығында бир чобан ҝөрүр. Вәзир өз-өзлүјүндә дејир ки, бу чобандан да сорушум бәлкә о јени бир ҹаваб дејә. Вәзир чобана јахынлашыр вә ондан дүнјада ән мурдар шејин нә олдуғуну сорушур. Чобан дејир: Мән бунун ҹавабыны билирәм, амма бир шәрти вар. Вәзир шәрти ешитмәмиш гәбул едир. Чобан дејир ки, әҝәр буну демәјими истәјирсәнсә, ҝәрәк өз нәҹисини јејәсән. Буну ешидән вәзир чох әсәбләшир вә чобаны өлдүрмәк истәјир. Чобан вәзирә дејир ки, сән мәни өлдүрә биләрсән, лакин архајын ол ки, сәнин өјрәндијин ҹаваб сәһвдир. Сән мән дедијими ет, әҝәр мәндән ганеедиҹи ҹаваб алмасан, бу һалда мәни өлдүрәрсән.
Вәзир тахт-таҹа чатмаг үчүн чобанын дедијини гәбул едир вә өз нәҹисини јејир.
Даһа сонра чобан вәзирә дејир:
Дүнјада ән мурдар, ән ијрәнҹ шеј тамаһдыр, чүнки сән она хатир елә бир шеји јемәјә һазыр олдун ки, онун дүнјанын ән мурдар шеји олдуғуну ҝүман едирдин.
Nur-az.com
Дилимизә чевирди: М. Әһмәд
