Әһли фәзлә бәллидир, кәрамәти Һүсејнин,
Јер-ҝөјү һејран гојуб, ҹәлаләти Һүсејнин.
Залыма баш әјмәјиб зүлмә табе олмады,
Мәшһур олуб ҹаһанда ҹәсарәти Һүсејнин.
Кәрбәла мүсибәти сәс салыб аләмләрә,
Һәкк олду гәлбләрә, һәрарәти Һүсејнин.
Әлинин нури-чешми, Пејғәмбәр баласыдыр,
Фатимәнин таҹыдыр, ләјагәти Һүсејнин.
Һашимиләр нәслинин мүбарәк өвладыдыр,
Пакдыр нәсли, шәрәфи, нәҹабәти Һүсејнин.
Фәда етди ҹаныны, өвладыны дин үчүн,
İдрака сығмаз олду, дәјанәти Һүсејнин.
Шәһид олду достлары, тәк галды мејдан ичрә,
Јенә дә сарсылмады, рәшадәти Һүсејнин.
Әббаси намидарә бәрабәр иҝид олмаз,
Зејнәби-Кубрада вар, мәтанәти Һүсејнин.
Шибһи Рәсул олубду Әли-Әкбәр баласы,
Кечибди Она ирсән, шүҹаәти Һүсејнин.
Һәбиб тәк ихтијари, Гасими ноҹәвани,
Əли Әсғәрди ҝүлү, тәравәти Һүсејнин.
Варис олан елминә, һелминә Сәҹҹади вар,
Галды Рүгаәјјәсиндә нәзакәти Һүсејнин.
Доггуз Имам бабасы, шәһидләрин Ағасы,
Меһди кими варыдыр, шәрафәти Һүсејнин.
Алты ҝүшә мәзары ашигләрә гибләдир,
Арзулар гапысыдыр, зијарәти Һүсејнин.
Мәләкләри һејрәтә салды, Һүсејн шөвкәти,
Нә јердә вар, нә ҝөјдә шәбаһәти Һүсејнин.
Јәвми ҹәза Халисә нәзәрә гылса Саһиби,
Нәсиб олар һалинә, шәфаәти Һүсејнин.
